Qashqadaryo viloyatining Koson tumani hokimi Asrol Boyqarayev yuqori lavozimdagi mansabdorga qo‘l ko‘tarishi ortidan qamoqqa olingani haqida xabar tarqaldi. Hokimlik esa buni rad etdi.
“Ommaga axborot yetkazayotgan shaxs o‘z axboroti to‘g‘ri ekani uchun ham mas’ulligini unutmasligi lozim. Shu o‘rinda eslatib o‘tamiz, Koson tumani hokimi davolanish uchun ta’tilga chiqqani va ayni paytda tuman hokimi birinchi o‘rinbosari tuman hokimi vazifasini vaqtincha bajarib turgani haqida xabar bergandik. Ammo bu holatni noto‘g‘ri talqin qilib, yolg‘on xabarlar tarqatish javobgarlikka sabab bo‘lishini ma’lum qilamiz”, — deyiladi hokimlikning rasmiy Telegram-kanalida.
Hokimlik axborot xizmati o‘z obunachilariga tuman hokimi sog‘lig‘ini tiklab, tez orada yana o‘z lavozimiga qaytishini ta’kidlaydi va “tasdiqlanmagan, vahima va shov-shuv uchun tarqatilayotgan yolg‘on xabarlarga ishonmang”, deya o‘z raddiyasiga yakun yasaydi.
Eslatib o‘tamiz, avvalroq Qarshi tumanining sobiq hokimi Maqsuda Mustafoyeva qamoqqa olingani, viloyat prokuraturasi esa buni rad etgani haqida xabar berilgandi.
Izoh (0)