Energetika vazirligi shtabi tomonidan 2022-yil aprel oyining 1—26 kunlari davomida iste’molchilarning tabiiy gazdan foydalanish holatlari tahlil qilindi, deb xabar beradi vazirlik matbuot xizmati.
O‘tkazilgan tadbirlarda, o‘tgan 26 kunda respublika bo‘yicha 142 ta holatda ulgurji iste’molchilar tomonidan amaldagi qoidalarga rioya etmagan holda 5 million 437 ming kub metr hajmdagi tabiiy gazdan noqonuniy va nooqilona foydalanish holatlari aniqlangan. Buning natijasida, gaz ta’minoti korxonalari manfaatlariga 4 milliard 703 million so‘m zarar yetkazilgan.
Ushbu miqdordagi tabiiy gaz o‘rtacha 1,5 mln xonadonning bir kunlik iste’molini tashkil qiladi. Noqonuniy foydalanish holatlarining eng ko‘pi – Buxoro, Jizzax, Namangan va Andijon viloyatlarida aniqlangan.
Aniqlangan barcha holatlar bo‘yicha tegishli hujjatlar rasmiylashtirilib huquqni muhofaza qiluvchi organlarga taqdim etilgan.
Ma’lumot uchun, 2022-yilning yanvar-mart oylarida respublika bo‘yicha ulgurji iste’molchilar tomonidan 25 milliard 831 million so‘m yoki 4 million xonadonning bir kunlik iste’moliga teng hajmdagi tabiiy gazdan noqonuniy foydalanilgan.
Avvalroq O‘zbekistonning uch viloyatida 7,6 mlrd so‘mlik gaz o‘g‘irlash holatlari aniqlangani, Navoiydagi issiqxona 11 mingdan ortiq xonadonning 1 kunlik iste’moliga teng gazdan noqonuniy foydalangani to‘g‘risida xabar berilgandi.
Mavzuga doir:
- Jizzaxda noqonuniy foydalanilgani uchun gazdan uzib qo‘yilgan issiqxona yana gazga ulanib zarar yetkazishda davom etgani aniqlandi
- Samarqand viloyatidagi gaz zapravka 5,4 mlrd so‘mlik gaz o‘g‘irlagani aniqlandi
- Toshkent viloyatidagi ikkita gaz zapravka 100 ming xonadonning 1 kunlik iste’moliga teng gazdan noqonuniy foydalangani aniqlandi
Izoh (0)