O‘zbekiston Markaziy banki boshqaruvi 21-aprel kuni bo‘lib o‘tgan navbatdagi yig‘ilishda asosiy stavkani o‘zgarishsiz — yillik 17 foiz darajasida saqlab qolish to‘g‘risida qaror qabul qildi.
Yig‘ilishda Markaziy bank eski banknotlar qachon muomaladan chiqarilishiga ham to‘xtalib o‘tdi.
2021-yilning boshida yangi nominaldagi 2 ming so‘mlik va 20 ming so‘mlik banknotlar muomalaga chiqarildi. Avgust va dekabr oylarida esa bosqichma-bosqich yangi ko‘rinishdagi 5 ming, 10 ming, 50 ming, 100 ming so‘mlik pullar muomalaga qo‘yildi.
Ushbu banknotlar shu nominaldagi eski namunadagi banknotlar bilan parallel ravishda muomalada bo‘lishi, ya’ni eski namunadagi 5 ming, 10 ming, 50 ming, 100 ming so‘mlik banknotlar to‘lov qobiliyatini yo‘qotmasligi belgilandi, — deydi Markaziy bankMa’lum bo‘lishicha, bugungi kunda eski namunadagi banknotlar tabiiy yo‘l bilan muomaladan qaytarib olinmoqda. Ya’ni muomalada bo‘lish jarayonida eskirgan va to‘lovga yaroqsiz holga kelgan pullar Markaziy bank tomonidan qaytarib olinadi.
Aholi orasida muomalada bo‘lgan banknotlar soni 2,5 mlrd donadan ortiq bo‘lsa, shundan 201 mln donadan ziyodi 2021-yilda chiqarilgan banknotlar hisoblanadi.
Muomalada eski namunadagi banknotlar salmog‘i yuqori ekanligini inobatga olib, ularni muomaladan chiqarish muddatlari cheklanmagan.
Avvalroq O‘zbekistonda mayda pullar kamayib ketayotgani haqida xabar berilgan edi.
Izoh (0)