Prezident hokimlarga avtomobil, mebel va ofis anjomlari xarid qilishni taqiqlagan paytda Toshkent hokimligi 1,2 mlrd so‘mga ot, 453 mln so‘mga mebel xarid qildi

Toshkent viloyati hokimligi prezident Shavkat Mirziyoyevning hokimlarga yil yakuniga qadar avtomobil, mebel va ofis anjomlari xarid qilishni taqiqlash to‘g‘risidagi topshirig‘iga qaramay 1 milliard 196 million so‘mga 10 ta zotdor ot va 453 million so‘mga mebel xarid qildi. Bu haqda davlat xaridlari portalida qayd etilgan.

“Daryo” muxbiri mazkur holatga izoh olish maqsadida viloyat hokimligi axborot xizmati mas’uli bilan suhbatlashdi.

“Zotdor otlarning xarid qilinishi viloyatda tashkil etilgan Chavandozlar maktabi faoliyati bilan bog‘liq bo‘lib, 1 milliard 196 million so‘mga xarid qilingan zotdor otlarning barchasi shu maktabga berilgan”, — dedi hokimlik axborot xizmati rahbari vazifasini vaqtincha bajaruvchi mas’ul.

Viloyat hokimligi axborot xizmatining “Daryo”ga bergan ma’lumotiga ko‘ra, onlayn savdo orqali “O‘zbegim otlari” MCHJdan har biri 119 million 600 ming so‘mga sotib olingan otlar Agentxon, Melikxon, Munosibxon, Rashmor, Maor, Kapral, Karnaval, Olamxon, Yataganbek, Aydemirxon laqabli otlar bo‘lib, axalteki va ingliz toza qonli otlari hisoblanadi.

“Bu otlar prezidentning 2021-yil 5-avgustdagi ‘Chavandozlar maktablari faoliyatini tashkil etish chora-tadbirlari to‘g‘risida’gi qarori ijrosini ta’minlash maqsadida xarid qilingan bo‘lib, bu haqda davlat xaridlari portalida ham aniq ma’lumotlar berilgan”, — deydi hokimlik axborot xizmati mas’uli.

Hokimlik mas’uli 453 million so‘mga mebel xarid qilinishiga ham to‘xtalib, barcha mebellar hokimlik binosi oldida yangi qurilgan videoanjumanlar, ishchi yig‘ilishlar o‘tkazishga mo‘ljallangan zal uchun sotib olinganini aytmoqda.

“Toshkent viloyati hokimligining o‘z binosi yo‘q. Hokimlik O‘rta Chirchiq tumani hokimligining eski binosidan foydalanib keladi. Aslida viloyat hokimlik tuzilmasi katta bo‘lgani uchun ayni paytda foydalanib turilgan bino oldidan qo‘shimcha binolar qurilib, kengaytirilmoqda. Barcha mebellar hokimlik binosi oldida yangi qurilgan videoanjumanlar, ishchi yig‘ilishlar o‘tkazishga mo‘ljallangan zal uchun sotib olingan. Hech qaysi mebel faqat hokim uchun sotib olinmagan, buni noto‘g‘ri tahlil qilish kerak emas”, — deydi Zoir Mirzayevning matbuot kotibi vazifasini vaqtincha bajarib turgan mas’ul.