Jahon mamlakatlari demokratiyasi indeksining 2021-yil yakunlari bo‘yicha e’lon qilingan reytingda O‘zbekiston 150-o‘rinni egallagan. Bu haqda 14-aprel kuni Xalqaro reyting va indekslar bilan ishlash bo‘yicha respublika kengashining navbatdagi yig‘ilishida Senat raisi Tanzila Norboyeva ma’lum qildi, deb xabar berdi “Daryo” muxbiri.
Ta’kidlanishicha, 2021-yilda e’lon qilingan mamlakatimiz uchun ustuvor bo‘lgan jami 19 ta xalqaro reytingda O‘zbekistonning o‘rni aks etib, 11 tasida O‘zbekiston o‘z pozitsiyasini yaxshilagan.
Xususan, Suveren kredit reytinglarida ijobiy tendensiyalar kuzatilib, S&P xalqaro reyting agentligi O‘zbekiston kredit reytingini “salbiy”dan “barqaror”ga, Moody’s agentligi esa “barqaror”dan “ijobiy”ga o‘zgartirgan.
Global innovatsiyalar indeksida O‘zbekiston 2021-yilda 7 pog‘onaga ko‘tarilib, 132 ta davlat orasida 86-o‘rinni egallagan va eng tez yuqorilagan mamlakatlar o‘ntaligiga kirgan.
Transparency International xalqaro tashkilotining 2021-yil uchun Korrupsiyani qabul qilish indeksida O‘zbekiston o‘z o‘rnini 6 pog‘ona yaxshilab, 180 ta davlat ichida 140-o‘rinni egalladi. So‘nggi besh yilda esa 17 pog‘ona yuqorilagan. Hisobotda O‘zbekiston Markaziy Osiyoda o‘rnak bo‘layotganligi va so‘nggi 5 yilda eng barqaror o‘sish ko‘rsatkichiga erishgan jahondagi 6 ta davlatdan biriga aylangani alohida ta’kidlangan.
“Shuningdek, Jahon mamlakatlari demokratiyasi indeksining 2021-yil yakunlari bo‘yicha e’lon qilingan reytingda O‘zbekiston o‘z pozitsiyasini 5 pog‘onaga yaxshilab, 150-o‘rinni egallagan. Jahon banki tomonidan yuritiladigan Boshqaruv sifati indikatorlarining ikkitasida mamlakatimizning o‘rni yaxshilangan bo‘lsa, ikkitasida pasaygan. Masalan, Aholi fikrini hisobga olish va hisobdorlik hamda Huquq ustuvorligi indikatorlarida mamlakatimiz o‘z pozitsiyasini yaxshilay olmagan”, — deydi Tanzila Norboyeva.
Izoh (0)