Ijtimoiy tarmoqlarda ikki erkak voyaga yetmagan bola ko‘z o‘ngida eshaklarning bo‘yniga tayoq bilan zarba bergan videosi tarqalgandi. Hayvonlarga ozor bergan ota-o‘g‘il javobgarlikka tortildi. Bu haqda “Daryo”ga viloyat sudi axborot xizmati rahbari Farhod Tilavov xabar berdi.
Ma’lum qilinishicha, voqea 2021-yil viloyatning Chiroqchi tumanidagi “Langar” MFY To‘laqo‘rg‘on qishlog‘ida sodir bo‘lgan bo‘lib, voqea ishtirokchilari ota-o‘g‘illar bo‘lgan.“Sudya O‘ktam Rasulov raisligidagi ko‘rib chiqilgan ishda hayvonlarga ozor bergan ota Alisher Ilyosov Ma’muriy javobgarlik to‘g‘risidagi kodeksning 111-moddasi 2-qismi (voyaga yetmagan shaxs hozirligida hayvonlarga nisbatan shafqatsiz munosabatda bo‘lish yoxud hayvonlarning mayib bo‘lishiga olib kelish) bilan aybdor deb topilib, unga 12 sutka ma’muriy qamoq jazosi tayinlandi. Voqeaning ikkinchi ishtirokchisi sudlanuvchining o‘g‘li B.S. voyaga yetmagani uchun uning xatti-harakati uchun ham otasi Alisher Ilyosov Ma’muriy javobgarlik to‘g‘risidagi kodeksning 47-moddasi (bolalarni tarbiyalash va ularga ta’lim berish borasidagi majburiyatlarni bajarmaslik) bilan aybli deb topilib, bazaviy hisoblash miqdorining bir baravari (270 ming so‘m) miqdorida jarimaga tortildi”, — deydi Farhod Tilavov.
Bundan avval Toshkentda qo‘shnisining ikkita xaski zotli itini o‘ldirgan erkakka 1,35 mln so‘m jarima belgilangani, Navoiyda noma’lum erkak bolalar ko‘z o‘ngida itni otib tashlagani hamda Toshkentda it va mushuklarni miltiqda otib yurgan erkak ushlangani haqida xabar berilgandi.
Izoh (0)