“Manchester Yunayted” Ronaldu asosiy tarkibda tushmagan o‘yinlarda g‘alaba qozona olmayapti

“Manchester Yunayted” Angliya Premyer Ligasi 31-turi doirasida “Lester”ga qarshi kechgan bahsda g‘alaba qozona olmadi (1:1).

Mankunianliklar so‘nggi olti o‘yinda bor-yo‘g‘i bitta g‘alabaga erishdi (uchta durang, uchta mag‘lubiyat). 12-mart kuni jamoa “Tottenhem”ni taslim etgandi (3:2). “Qizil iblislar”ning keyingi o‘yini 9-aprel kuni “Everton”ga qarshi bo‘ladi.

Mazkur o‘yinni Krishtianu Ronaldu xastalik sabab o‘tkazib yubordi. Portugaliyalik futbolchi joriy mavsum APLda olti marta asosiy tarkibda maydonga tushmadi. Ularning barchasida “Manchester Yunayted” g‘alaba qozona olmagan.

Beshta o‘yinda (“Everton”, “Chelsi”, “Aston Villa”, “Byornli” va “Lester”) durang qayd etilgan bo‘lsa, yana bir bahs (“Manchester Siti”) mag‘lubiyat bilan tugagan.

Ronaldu joriy mavsum APLda 24 ta o‘yin o‘tkazib, 12 ta gol va uchta golli uzatma muallifiga aylandi.