Davlat xavfsizlik xizmati chirchiqlik fuqaroni Buxoroga borib, 10 million 100 ming so‘m miqdoridagi qalbaki milliy valyutani 600 dollarga sotayotgan vaqtida qo‘lga oldi. Bu haqda O‘zA xabar qildi.
Qayd etilishicha, shundan so‘ng tezkor tadbir davom ettirilib, uning Gulistonda yashovchi jinoiy sherigi 600 dollarni qabul qilib olgan vaqtida ushlangan. Uning uyida 2 million 150 ming so‘m miqdorida qalbaki banknotlar borligi aniqlangan. Surishtiruv davomida pullar aslida Andijon shahrida tayyorlanishi ma’lum bo‘lgan.
Dastlab Andijonda yashovchi shaxs o‘zining Damas mashinasida 3 million 200 ming so‘m miqdoridagi 64 dona 50 ming so‘mlik qalbaki banknotlarni olib ketayotganda ushlangan. So‘ngra bu pullarni tayyorlovchi yana bir fuqaroning uyidan pul tayyorlashda kerak bo‘ladigan buyumlar hamda 14 million 550 ming so‘m miqdoridagi qalbaki pullar topilgan. Jinoiy guruh shu vaqtgacha jami 300 million so‘mdan ortiq qalbaki pullarni Andijon, Namangan va Farg‘ona viloyatlari hamda Toshkent shahrida muomalaga kiritishga ulgurgan.
Holat yuzasidan mazkur shaxslarga nisbatan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Avvalroq Toshkentda qalbaki 5 ming dollarni muomalaga kiritayotgan shaxslar ushlangani xabar qilingandi. Shuningdek, Andijonda qalbaki 100 million so‘m kupyuralarni sotishga uringan shaxslar qo‘lga olingani, Toshkent viloyatida qalbaki 100 ming so‘mlik kupyuralarni tayyorlash bilan shug‘ullangan oila aniqlangani haqida xabar berilgan.
Izoh (0)