Qashqadaryoda tibbiyot xodimlarini majburiy mehnatga jalb qilgan bosh shifokor javobgarlikka tortildi. Bu haqda Bandlik va mehnat munosabatlari vazirligi ma’lum qildi.

Qayd etilishicha, Qarshi tuman tibbiyot birlashmasining reanimatsiya bo‘limi boshlig‘i bo‘limda faoliyat yurituvchi hamshira va orastabonlarni tuman tibbiyot birlashmasi hovlisini tozalashga majbur qilgani uchun Ma’muriy javobgarlik to‘g‘risidagi kodeksining 51-moddasi 1-qismi (mehnatga biron-bir shaklda ma’muriy tarzda majburlash)ga asosan jarimaga tortilgan.

Vazirlik tuman tibbiyot birlashmasining bo‘lim boshlig‘i qancha jarima to‘laganiga aniqlik kiritmagan. Ammo Ma’muriy javobgarlik to‘g‘risidagi kodeksining 51-moddasi 1-qismida mazkur ishga qo‘l urganlar bazaviy hisoblash miqdorining ellik baravaridan yuz baravarigacha miqdorda jarima solishga sabab bo‘lishi qayd qilingan.

Avvalroq Qashqadaryoda tibbiyot xodimlari shifoxona hududini tozalashga jalb qilingani ko‘ringan video tarqalgandi. Videoda tungi paytda tuman tibbiyot birlashmasi hovlisidagi o‘tlarni tozalayotgani ko‘ringan tibbiyot xodimlari tozalash ishlari bo‘lishi kerakligi haqida tuman tibbiyot birlashmasiga topshiriq bo‘lganini aytgandi.