DSQning hay’at yig‘ilishida 13 nafar davlat soliq inspeksiyasi boshlig‘i lavozimidan olindi, 40 dan ziyod rahbar xodimga intizomiy choralar ko‘rildi

Davlat soliq qo‘mitasining keskin tanqidiy-tahliliy ruhda o‘tkazilgan navbatdagi hay’at majlisida 13 nafar Davlat soliq inpeksiyasi boshlig‘i lavozimdan olindi, deb xabar beradi qo‘mita matbuot xizmati.

Hay’at majlisida I chorak yakunlari bo‘yicha soliq organlari faoliyat ko‘rsatkichlari tahlil qilingan va prezidentning 16-mart kuni Davlat soliq qo‘mitasiga tashrifi davomida belgilab bergan vazifalarining so‘zsiz ijro etilishi masalalari muhokama qilingan.

Shuningdek, yig‘ilishda erishilgan yutuqlar bilan bir qatorda, yo‘l qo‘yilgan xato va kamchiliklar hamda mavjud muammolar ochiq va keskin ravishda tanqid qilingan. Jumladan, soliq ma’murchiligini ta’minlash, soliq bazasini kengaytirish hisobiga qo‘shimcha daromadlarni jalb etish va yuklatilgan vazifalarni bajarishda yo‘l qo‘ygan xato va kamchiliklari uchun:

• yirik soliq to‘lovchilar bo‘yicha hududlararo davlat soliq inspeksiyasi, Qashqadaryo va Toshkent viloyati Davlat soliq boshqarmasi, Kogon hamda Andijon shahar Davlat soliq inspeksiyasi rahbarlariga nisbatan navbatdagi intizomiy jazo choralari belgilangan;
• Andijon, Olot, Zomin, Paxtakor, Forish, Uchqo‘rg‘on, Qo‘shrabot, Urgut, Jarqo‘rg‘on, Termiz, Sirdaryo, Guliston tumanlari hamda Yangiyer shahar Davlat soliq inpeksiyalari boshliqlari lavozimidan ozod etildi;
• bundan tashqari, soliq qarzini majburiy undirishga qaratishda yo‘l qo‘ygan xato va kamchiliklari uchun Asaka, Chiroqchi, Mingbuloq, Urgut, Mirzaobod, Sardoba, Bag‘dod, Qumqo‘rg‘on tumanlari hamda Quvasoy va Jizzax shahar Davlat soliq inspeksiyalari bo‘lim boshliqlari lavozimidan ozod etilgan;
• savdo va xizmat ko‘rsatish sohasida “Soliq hamkor” tizimi orqali tushgan murojaatlar bilan ishlash hamda ushbu yo‘nalishda nazorat tadbirlarini amalga oshirishdagi jiddiy xato va kamchiliklari uchun Nukus, Jizzax va Andijon shaharlari, G‘ijduvon, Chiroqchi, Karmana, Pop, Urgut hamda Bekobod tumani DSI Sayyor soliq tekshiruvlari bo‘lim boshliqlari ham lavozimidan ozod etilgan.

Hay’at yig‘ilishida Davlat soliq qo‘mitasi raisi o‘rinbosarlarining hisobotlari eshitilib, shaxsiy mas’uliyati belgilangan.