29-mart kuni soat 02:00 larda Samarqand davlat universitetiga qarashli talabalar yotoqxonasida talaba qiz o‘zini yuqori qavatdan tashladi, deb xabar beradi “Zamon.uz” nashri.
Ma’lum bo‘lishicha, talaba qiz universitetning kechki ta’lim shaklida, 2-kursda o‘qigan. Universitetning yoshlar masalalari bo‘yicha birinchi prorektori Shahzoda Negmatovaning so‘zlariga ko‘ra, talabaning o‘qishdagi o‘qituvchi yoki kursdoshlari bilan nizoli holatlari, biror muammosi bo‘lmagan.
Ta’kidlanishicha, talaba qiz yotoqxonaning 6-qavatida yashagan, biroq u o‘zini 9-qavatdan tashlagan.
Marhumaning xonadoshlarining so‘zlariga ko‘ra, oxirgi vaqtlarda uning kayfiyati bo‘lmagan.
Eslatib o‘tamiz, 2021-yilning dekabrida Qashqadaryoda texnikum talabasi yotoqxonaning 5-qavatidan tushib ketib, vafot etgandi. Keyinroq “Daryo” muxbiri voqea tafsilotlarini o‘rganish maqsadida texnikum yotoqxonasi va o‘quv binosida bo‘lib, marhumani tanigan-bilganlarni suhbatga tortgan edi.
Izoh (0)