Buyuk Britaniya bosh vaziri Boris Jonson Yevropa Chempionatini Ukrainada o‘tkazishni taklif qildi.
Ushbu taklifi sabab Jonson o‘z mamlakatida keskin e’tirozlarga uchradi. Jumladan, Buyuk Britaniya bosh vazirining Angliya futbol assotsiatsiyasi (FA) bilan munosabatlari yomonlashdi.
Daily Mail’ning xabariga ko‘ra, siyosatchi Yevro—2028 ni Ukraina hududida o‘tkazish taklifini berganidan so‘ng vaziyat keskinlashgan. Chunki sal avval Buyuk Britaniya va Irlandiya birgalikda musobaqa mezbonligi uchun FIFAga ariza topshirgan edi.
Boris Jonson, shuningdek, Ukrainaning saralash o‘yinlarisiz JCh—2022 musobaqasiga yo‘l olishiga imkon berish kerakligini ham ta’kidlagan.
Avvalroq Rossiya ham 2028 yoki 2032-yilgi Yevropa chempionatini o‘tkazishga qiziqayotgani, UEFA esa bu arizani rad etishga urinib ko‘rish uchun shoshilinch yig‘ilish o‘tkazishi xabar qilingandi.
Yevro—2028 va Yevro—2032 musobaqalari mezbonligi uchun ariza topshirish muddati 12-aprelga qadar uzaytirilgan. Avvaliga bu muddat 23-martgacha qilib belgilangandi. Turnirlar qaysi davlatlarda o‘tkazilishi haqidagi qaror 2023-yil sentabr oyida qabul qilinadi.
Ma’lumot uchun UEFA 2028-yildan Yevropa Chempionati ishtirokchilari sonini 32 taga yetkazmoqchi.
Izoh (0)