Yevropa Chempionlar Ligasi nimchorak final javob bahsi doirasida “Liverpul” 8-mart kuni “Inter”ga imkoniyatni boy berdi (0:1), biroq dastlabki o‘yindagi g‘alaba (2:0) evaziga keyingi bosqichga yo‘l oldi.
Yurgen Klopp “Liverpul”ni to‘rtinchi marta Chempionlar Ligasi chorak finaliga olib chiqdi. Germaniyalik mutaxassis 2017/18, 2018/19 va 2020/21-yilgi mavsumlarda ham YChL chorak finaliga chiqqandi. Faqat Bob Peysli mersisaydliklar boshqaruvida bu natijaga ko‘proq (5 marta) erishgan.
YChL pley-off bosqichida o‘n yil deganda ilk bor gol urgan “Inter” ingliz klubining 15 o‘yindan iborat mag‘lubiyatsiz seriyasiga nuqta qo‘ydi. Oxirgi marta “Liverpul” 2021-yilning 28-dekabrida “Lester”ga mag‘lub bo‘lgandi.
Shuningdek, “Liverpul”ning barcha musobaqalar doirasida “Enfild”dagi mag‘lubiyatsiz seriyasi bir yil deganda o‘z yakuniga yetdi. Bu vaqt ichida “qizillar” o‘z uyida 21 ta g‘alaba va bitta durang qayd etdi. So‘nggi bor Klopp jamoasi 2021-yilning 7-martida APL doirasida “Fulhem”ga yutqazib qo‘ygandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)