Vladimir Putin: 8—16 yoshli farzandi bor “kam ta’minlangan” oilalarga yordam pullari ajratiladi

Rossiyada 8 yoshdan 16 yoshgacha farzandi bo‘lgan “kam ta’minlangan” oilalarga davlat tomonidan yordam puli ajratiladi. Bu haqda mamlakat prezidenti Vladimir Putin 8-mart — Xalqaro xotin-qizlar kuni munosabati bilan yo‘llagan tabrigida ma’lum qilgan.

“Biz yangi qaror qabul qilishimiz kerak — 8 yoshdan 16 yoshgacha farzandi bo‘lgan kam ta’minlangan barcha oilalarni qo‘llab-quvvatlash uchun yordam pullari berilishini nazorat qilish. Ushbu chora 1-apreldan kuchga kiradi, oilalar dastlabki yordam pullarini maydan boshlab oladi”, — deydi Putin.

Yangi tartibdagi yordam pullarini olish uchun daromad qancha bo‘lishi va davlat ajratadigan mablag‘ning miqdoriga Putin aniqlik kiritmagan. Biroq u hukumat farzandli oilalarni qo‘llab-quvvatlashni davom etishini ta’kidlagan.

“Bizda homilador va yetti yoshgacha farzandi bo‘lgan kam ta’minlangan oilalarga davlat tomonidan oylik yordam pullarini ajratish ko‘zda tutilgan. Bundan tashqari, 8 yoshdan 16 yoshgacha bo‘lgan farzandini yolg‘iz katta qilayotgan ota-onalar yordam olib kelmoqda”, — deya qayd etadi Rossiya prezidenti.

Shu bilan birga, Putin o‘z tabrigida Ukrainadagi urushga ham to‘xtalib o‘tgan.

“Qayd etish joizki, jangovar harakatlarda muddatli harbiy hizmatni o‘tayotgan askarlar qatnashmayapti va qatnashmaydi ham. Zaxiradagilardan ham qo‘shimcha chaqiruv bo‘lmaydi. Belgilangan vazifalarni faqat professional harbiylar hal qiladi”, — deydi u.

Avvalroq Rossiya Mudofaa vazirligi va Vladimir Putinning o‘zi ham muddatli harbiy xizmatchilar Ukrainadagi urushda ishtirok etmayotganini ma’lum qilgandi.