Buxoro viloyatining Qorako‘l tumanida iste’molchilar huquqlarini himoya qiluvchi jamiyat raisi tadbirkor huquqini himoyalashi evaziga undan 700 dollar olgani ma’lum bo‘ldi. Bu haqda “Daryo”ga Bosh prokuratura huzuridagi Iqtisodiy jinoyatlarga qarshi kurashish departamentining viloyat boshqarmasi axborot xizmati rahbari xabar berdi.
Ta’kidlanishicha, departamentning Qorovulbozor tuman bo‘limi tomonidan tadbirkorlik subyektlarining huquqlarini himoya qilish yuzasidan tekshiruv o‘tkazilgan. Shu jarayonda Qorako‘l tumani iste’molchilar huquqlarini himoya qilish jamiyati raisi vazifasini bajaruvchi I.K.ga fuqaro M.R. “F.M” MCHJ tomonidan qurilayotgan uy uchun amalga oshirgan to‘lovini qaytarib olishda yordam berishni so‘rab, murojaat qilgan.“Jamiyat raisi MCHJ rahbarining ishonchiga kirib, uning ishiga ko‘maklashishi evaziga tadbirkordan 700 dollar pul olib, o‘z ehtiyojlariga sarflab yuborgan. Tadbir davomida tadbirkor departament vakillariga uzoq vaqtdan beri ishi hal bo‘lmayotgani va buning evaziga jamiyat raisi undan 700 dollar olib, qaytarib bermayotganini bildirgan”, — deydi axborot xizmati rahbari.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Mavzuga doir:
- Andijon va Xorazm viloyatlarida fuqarolarni o‘qishga kiritish uchun jami 3 ming dollar olgan shaxslar ushlandi
- Surxondaryoda otasiga tegishli yerni 32,5 mln so‘mga sotib yuborishga uringan bojxona inspektori qo‘lga olindi
- Farg‘onada 30 nafar talabaning o‘qishini Qirg‘izistondan O‘zbekistonga ko‘chirib berish uchun 67 ming dollar olgan shaxslar ushlandi
Izoh (0)