Rossiyadagi O‘zbekiston fuqarolarining mamlakatga kelishlari uchun qulaylik yaratish maqsadida 2022-yil fevral oyida “O‘zbekiston temir yo‘llari” AJ tomonidan Voljskiy—Toshkent yo‘nalishida 483-sonli maxsus yo‘lovchi poyezdining ikki marotaba qatnovi amalga oshiriladi. Bu haqda Transport vazirligi xabar berdi.
Ma’lum qilinishicha, ushbu poyezdlar 2022-yil 18- va 25-fevral kunlari soat 20:50 da “Voljskiy” temiryo‘l vokzalidan harakatini amalga oshiradi. Poyezdga faqat bir tomonga, ya’ni Voljskiy—Toshkent yo‘nalishiga chiptalar sotiladi. Chiptalarni elektron tarzda ham sotish yo‘lga qo‘yilgan.
Rossiyadagi fuqarolarning yaqinlari O‘zbekistonda turib, ularning shaxsini tasdiqlovchi hujjatining nusxasi bilan “O‘zbekiston temir yo‘llari” veb-sayti orqali “E-ticket.railway.uz”dan chiptalarni elektron tarzda xarid qilib, jo‘natishi ham mumkin.
Eslatib o‘tamiz, Rossiyada qolib ketgan o‘zbekistonliklarni qaytarish uchun 2021-yilning oktabrda — 3 ta, noyabrda — 6 ta, dekabr oyida esa 8 ta maxsus poyezd reysi yo‘lga qo‘yilgandi.
Izoh (0)