Yaponiya Sog‘liqni saqlash vazirligi koronavirusga qarshi Pfizer vaksinasini 5 yoshdan 11 yoshgacha bo‘lgan bolalarda ham qo‘llashni ma’qulladi, deb xabar beradi Kyodo agentligi.
Ta’kidlanishicha, bolalarni emlash 2022-yilning martidan boshlanadi. 8 millionga yaqin bola vaksina olish huquqiga ega bo‘ladi.
Mamlakat Sog‘liqni saqlash vazirligi ma’lumotlariga ko‘ra, ushbu yosh guruhidagilar uchun vaksina dozasi kattalarga mo‘ljallangan dozaning uchdan bir qismini tashkil etadi. Ulardagi faol moddalar bir xil, ammo bolalar buning uchun maxsus yaratilgan dori vositasi bilan emlanadi.
Ayni vaqtda Yaponiyada 12 yosh va undan kattalarni koronavirusga qarshi emlashga ruxsat berilgan.
Avvalroq Isroilda apreldan chaqaloqlarni koronavirusga qarshi emlash boshlangani, Braziliya prezidenti o‘z qizini koronavirusga qarshi emlatishdan bosh tortgani, Avstriya Yevroittifoq mamlakatlaridan birinchi bo‘lib majburiy vaksinatsiyani joriy qilgani to‘g‘risida xabar berilgandi. Ta’kidlash kerakki, O‘zbekistonda ham 5 va 11 yoshli aholi qatlamini koronavirusga qarshi emlash bo‘yicha alohida ko‘rsatma tayyorlangan.
Izoh (0)