Vulqon otilishi va sunamidan jabr ko‘rgan Tonga orollari aholisiga gumanitar yordam olib ketayotgan Avstraliya samolyoti bortdagi bir kishida koronavirus testining natijasi musbat chiqqani sababli yarim yo‘ldan aeroportga qaytdi. Bu haqda The Week xabar berdi.
Parvozning barcha ishtirokchilari bortga chiqishdan oldin tezkor antigen testlaridan salbiy natija bilan o‘tgan, deb yozadi nashr Avstraliya qurolli kuchlari vakiliga tayanib. Biroq bundan oldin ular PZR-testlarini ham topshirgan, natijalar samolyot yo‘lga chiqqanidan so‘ng ma’lum bo‘lgan. Bir kishida PZR-testi ijobiy natija ko‘rsatgan, ekipajga ortga qaytish buyurilgan. Gumanitar yordam 20-yanvar kuni Brisben shahridan uchgan boshqa samolyotga qayta ortilgan.
Xunga-Xaapay Tongu vulqonining otilishi va mamlakatga sunami urilishidan so‘ng Buyuk Britaniya, Xitoy va Yaponiya Tongaga gumanitar yordam jo‘natmoqda. Orollarda 105 mingga yaqin odam istiqomat qiladi, pandemiya boshlangandan beri mamlakat hududida faqat bitta COVID-19 ga chalinish holati aniqlangan, hozir u yerda hech kim infeksiya bilan og‘rimagan.
Tonga hukumati koronavirus tarqalishining oldini olish uchun chegarada qattiq nazorat o‘rnatgan. 20-yanvardan orollarga keltirilishni boshlagan gumanitar yordam mahalliy aholiga kontaktsiz uzatilmoqda.
Avstraliya va Yangi Zelandiyadan yordam jo‘natmalari Tongaga yetib borgani aytilmoqda — xususan, ichimlik suvi zaxiralari, dengiz suvini tuzsizlantirish vositalari, dori-darmonlar, aloqa vositalari va gigiyena vositalari yetkazilgan.
Tabiiy ofat tufayli, dastlabki rasmiy ma’lumotlarga ko‘ra, kamida uch kishi halok bo‘lgan va ko‘plab qishloqlar deyarli butunlay vayron bo‘lgan. Vulqon otilishdan so‘ng, barcha yuzalar vulqon kuli bilan qoplangan, natijada ichimlik suvining taqchilligi kutilmoqda.
Izoh (0)