Navoiy viloyatining Nurota tumanida 2021-yil 6-noyabr kuni yuz bergan YTHda 8 kishi halok bo‘lgani, ularning 3 nafari bank xodimi ekani ma’lum qilingandi. Mazkur holat Bandlik va mehnat munosabatlari vazirining buyrug‘iga asosan tuzilgan maxsus komissiya tomonidan to‘liq o‘rganilgan.
Ta’kidlanishicha, ushbu vaziyat mehnat faoliyati bilan bog‘liq holda yuz bergan hodisa deb topilgan va jabrlanuvchilarning har biriga N-1 shaklidagi dalolatnoma tuzish yuzasidan “Xalq banki” boshqaruvi raisi nomiga va bankning Navoiy viloyati filialiga yozma ko‘rsatma kiritilgan.
Shuningdek, maxsus tekshirish materiallari Navoiy viloyati Ichki ishlar boshqarmasi huzuridagi Tergov boshqarmasiga yuborilgan.
Ma’lumki, 6-noyabr, shanba kuni, “Xalq banki” tizimida ham rasman dam olish kuni. Biroq marhum xodimlar yuqori turuvchi rahbarlar bergan topshiriqlarni bajarish uchun dam olish kunida ishga chiqishga majbur bo‘lgan. Xabarlarga ko‘ra, shanba kuni ular ertalabdan viloyat filialidagi norasmiy yig‘ilishga chaqirilgan. Lekin o‘rtada biror-bir rasmiy xat yoki dam olish kuni ishga chiqish, mehnat majburiyatlari bilan shug‘ullanish haqida buyruq yoki qaror bo‘lmagan.
“Xalq banki” matbuot xizmatining holat yuzasidan bildirgan munosabatida marhumlarning oila a’zolari va yaqinlariga hamdardlik bildirilgan, ammo qo‘shimcha tafsilotlar, ya’ni nega aynan dam olish kuni xodimlari bilan bunday holat yuzaga kelgani haqida hozircha izoh keltirmagan.
Eslatib o‘tamiz, 8 kishining halok bo‘lishiga olib kelgan ushbu YTH qarama-qarshi yo‘nalishda harakatlanib kelayotgan ikkita Nexia to‘qnashuvi oqibatida yuz bergan. Mashinalarning biri yo‘l chetiga ag‘darilgan, ikkinchisi esa yonib ketgan.
Avtohalokat oqibatida “Xalq banki” Nurota tuman filialining boshqaruvchisi T.P. (29 yosh), bosh hisobchisi M.S. (40 yosh) hamda monitoring bo‘limi boshlig‘i Yu.R. (32 yosh) voqea joyida vafot etgan. Yonib ketgan mashinada 5 kishi bo‘lgan va ular ham voqea joyida halok bo‘lgan.
Izoh (0)