Guliston—Bo‘ka—Angren—Qo‘qon—Andijon orqali—O‘sh avtomobil yo‘lining Qamchiq dovonidan o‘tgan qismi 224—245 kilometrlar oralig‘ida qor yog‘moqda. Bu haqda “Qamchiqavtoyo‘l” xabar berdi.
Ma’lum qilinishicha, qor yog‘ib turgan paytda dovonda transport vositalarining beto‘xtov ikki tomonlama harakatlanishi ta’minlash uchun “Qamchiqavtoyo‘l” tomonidan yo‘llarni qordan tozalash ishlari bajarilmoqda.
“Transport vositalari ikki tomonlama xavfsiz harakatlanmoqda. Qor yo‘llarda ko‘rinish 300 metrni, havo harorati 0 daraja, namlik 88 foizni tashkil etmoqda. Qamchiq dovoni yo‘lidan yuradigan haydovchilardan barcha xavfsizlik choralarini ko‘rishni tavsiya qilamiz”, — deyiladi xabarda.
IIV YHXBB dovon yo‘lidan harakatlanuvchi haydovchilardan tezlik me’yoriga rioya qilgan holda, oraliq masofani saqlab, ehtiyotkorlik bilan harakatlanishni so‘ragan.
Eslatib o‘tamiz, 6-yanvar kuni Qamchiq va Taxtaqoracha dovonlarida qor yog‘gandi. 15-yanvar kuni esa FVV Chimyon hududida qor ko‘chish xavfini e’lon qilgan.
Izoh (0)