Toshkent shahrida 7-yanvar kuni YHX xodimlarining qonuniy talablariga bo‘ysunmay, qochishga uringan Malibu avtomobilni to‘xtatishda o‘qotar qurollardan foydalanilgandi. Qoidabuzar haydovchi holat sababini ma’lum qildi.
Eslatib o‘tamiz, 7-yanvar kuni soat 15:00 larda Yunusobod tumani Yangi shahar ko‘chasi bo‘ylab kuchli darajada mast bo‘lgan fuqaro A.A. (1976-yilda tug‘ilgan) Malibu avtotransportida shu yerda xizmat o‘tayotgan YHX xodimlarining qonuniy talablariga bo‘ysunmasdan, o‘zgalarning hayoti va sog‘lig‘iga xavf solgan holda qochishga uringan. Xodimlar haydovchining noqonuniy harakatlari natijasida yuzaga kelishi mumkin bo‘lgan og‘ir oqibatlarning oldini olish maqsadida belgilangan tartibda o‘qotar qurol qo‘llagan. Natijada avtotransport vositasi majburiy to‘xtatilib, haydovchi zararsizlantirilgandi.
“Yunusobod tumani Yangishahar ko‘chasida yo‘lning qarama-qarshi tomonidan Malibu rusumli davlat raqami bo‘lmagan avtoulov katta tezlik bilan harakatlanib kelayotgan paytida yo‘lning o‘rtasiga chiqib, to‘xtatish maqsadida diqqat ishorasini berdim. Diqqat ishoraga bo‘ysunmasdan harakatlangani, fuqarolar hayotiga xavf solgani va xodimlarning qonuniy talablariga bo‘ysunmagani sababli IIV me’yoriy buyruq va talablariga asosan qurol qo‘lladim”, — degan YPX inspektori Elshod Rahmatov.
Hujjatlar o‘rganilganida ushbu fuqaro 2006-yilda jinoyat ishlari bo‘yicha Chirchiq shahar sudi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismida ko‘rsatilgan jinoyatni sodir etgani, jinoyat ishi yarashuv bilan tugatilgani aniqlangan.
2007-yilda esa shu turdagi jinoyat ishi amnistiyaga asosan yakunlangan.
Bundan tashqari, haydovchi 2021-yilda xavfsizlikni kamarini taqmaslik, qizil chiroqdan bo‘ysunmasdan o‘tish, ruxsatsiz tusi o‘zgartirilgan oyna o‘rnatish, transport vositalarini quvib o‘tish va yo‘l belgilariga amal qilmaslik kabi qoidabuzarliklarni sodir etgan. Buning uchun jami 7 million 900 ming so‘mdan ziyod jarimaga tortilgan.
“Beldirsoyga bordim. O‘sha yerda aroq ichdim. To‘rt kun turdim, beshinchi kuni bu yer qimmatlik qilarkan, deb hisob-kitob qilmoqchi bo‘ldim. Yonimdagi pul yetmasdi, Toshkentga do‘konimdan pul olish maqsadida kelgandim. To‘g‘ri uyimga keldim. Xodimlarning to‘xtatishiga qaramasdan, qonuniy talablariga bo‘ysunmadim. Qilgan ishlarimdan afsusdaman, ayb menda, bo‘ynimga olaman. Aroq ichibman, pivo ichibman, keyin ‘voobshe’ o‘chib qolibman”, — degan Malibu haydovchisi.
Holat yuzasidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
Izoh (0)