Namangan viloyati Yangiqo‘rg‘on tumanida bojxona orqali tovarlarni Qirg‘izistondan noqonuniy olib o‘tib berish uchun pora olgan profilaktika inspektori ishdan olindi. Bu haqda viloyat Ichki ishlar boshqarmasi xabar qildi.
Ma’lum qilinishicha, Yangiqo‘rg‘on tumani IIB profilaktika inspektori 29-yanvar kuni telefon orqali tanishiga bir necha marta qo‘ng‘iroq qilib, Qirg‘izistondan noqonuniy ravishda o‘tkaziladigan tovarlarni maxsus do‘kon norasmiy xodimi S.B. bilan “Qizilyozi” mahallasida joylashgan blokpostdan o‘tkazilishida yordam berishini, buning evaziga 700 AQSh dollari miqdorida pul mablag‘i olishini aytib, taklif bildirgan.
Qayd etilishicha, u mahalladoshi U.S. bilan birgalikda Yangiqo‘rg‘on tumani “Mo‘g‘ol” mahallasidagi aylanma yo‘llar orqali 2300 kilogramm pista mevalarini Qirg‘izistondan o‘tkazib, Hyundai-Porter avtomashinasida Mo‘g‘ol—Namangan yo‘nalishida tashib ketayotgan vaqtida harbiy xizmatchilar tomonidan ushlangan.
Ta’kidlanishicha, profilaktika inspektoriga tegishli bo‘lgan raqam orqali olib borilgan telefon so‘zlashuvlari ro‘yxatini ko‘zdan kechirish jarayonida 29—30-yanvar kunlari ish bo‘yicha ayblangan D.T.ning foydalanuvidagi raqam bilan 13 marotaba, U.S.ning foydalanuvidagi raqam bilan 9 marotaba hamda S.B.ning foydalanuvidagi raqam bilan 21 marotaba muloqotda bo‘lgani aniqlangan.
Holat yuzasidan xizmat tekshiruvi tayinlangan. Namangan viloyat IIBning 28-aprel kungi qaroriga ko‘ra, inspektor IIO xizmatidan bo‘shatilgan.
Mavzuga doir:
- Andijonda kadastr xodimining 7800 dollar pora bilan qo‘lga tushishi ortidan filial rahbari ishdan olindi
- Olmaliqda sotuvchilarning buyumlarini tortib olgan uch nafar soliq xodimi ishdan bo‘shatildi va maxsus unvonlari bekor qilindi
- Toshkentda mast holda jamoat tartibini buzgan ichki ishlar organi xodimi lavozimidan ozod etildi
Izoh (0)