“Manchester Yunayted” 21-noyabr kuni Ole-Gunnar Sulsherni iste’foga chiqardi. 48 yoshli mutaxassis mankunianliklarning sobiq yulduzi sifatida jamoaga tashrif buyurgandi. Ammo barchasi og‘riqli va sharmandali yakun topdi: 25-sentabrdan keyin “Manchester Yunayted” APLdagi 7 o‘yinda faqat bir marotaba g‘alaba qozondi (5 ta mag‘lubiyat, bitta durang).

Endi barchasi boshidan boshlanadi — yangi tarix, yangi muvaffaqiyatlar va yangi muammolar. Ushbu sahifada Sulsherning “Manchester Yunayted”dagi faoliyatini raqamlarda ko‘rib chiqiladi.

• Iste’foga chiqqan kunini (2021-yil 21-noyabr) ham hisobga olganda Sulsher 1068 kun mobaynida “Manchester Yunayted” bosh murabbiyi sifatida faoliyat olib bordi. Umumiy hisobda u jamoa bilan 168 ta o‘yin o‘tkazdi: 92 ta g‘alaba, 35 ta durang va 41 ta mag‘lubiyat qayd etdi.
• Ole-Gunnar Sulsherning jamoadagi davri ikkiga bo‘linadi. Birinchisi — 99 kun mobaynida (2018-yil 19-dekabrdan 2019-yil 28-martga qadar) vaqtinchalik bosh murabbiy bo‘lgan. Ikkinchisi — 969 kun (2019-yil 28-martdan 2021-yil 20-noyabrga qadar) mobaynida jamoa bosh murabiyi sifatida ishlagan.
• Sulsher qo‘l ostida “qizil iblislar” 323 ta gol urdi va 198 ta gol o‘tkazib yubordi. “Manchester Yunayted”ning eng yirik g‘alabasi — 9:0 (2021-yil fevral oyida “Sauthempton” ustidan qozonilgan). Yirik mag‘lubiyat — 1:6 (2020-yil oktabr oyida “Tottenhem”dan qabul qilingan).

• Sulsher qo‘l ostida mankunianliklar umuman sovrin qo‘lga kirita olmadi. 2020/21-yilgi mavsum Yevropa Ligasi finaliga qadar yetib bordi. Ammo “Vilyarreal” penaltilar seriyasida g‘alabani ilib ketdi — 11:10.
• Ole-Gunnar “Manchester Yunayted”ning sovrinlarsiz seriyasini 4 yilga uzaytirdi. Aniqroq qilib aytganda, 1638 kun.
• Norvegiyalik mutaxassis davrida 16 nafar futbolchi “Yunayted” safida APLda debyut qildi. Ole-Gunnar qo‘l ostida eng ko‘p o‘yin o‘tkazgan futbolchi — Markus Reshford. U barcha musobaqalarda 135 ta o‘yinda maydonga tushdi.
• Mankunianliklar Sulsher bilan APLda 127 o‘yinda 209 ochko jamg‘ardi. Bu qo‘lga kiritish mumkin bo‘lgan natijaning 54,85% qismi.
• Norvegiyalik iste’foga chiqishidan avval jamoa o‘z maydonidagi ketma-ket 15 o‘yinda gol o‘tkazib yubordi. “Qizil iblislar” tarixida faqatgina bir marta bundan yomonroq natija qayd etilgan: 1958-yildan 1959-yilga qadar ingliz jamoasi ketma-ket 21 ta uy uchrashuvida gol o‘tkazgan.
• Sulsher qo‘l ostidagi eng og‘riqli mag‘lubiyat joriy mavsumda qabul qilib olindi. Oktabr oyida “Liverpul” “Old Trafford”da mezbonlar darvozasiga javobsiz 5 ta gol urdi. Jamoa APL o‘yinlarida ilk bor birinchi bo‘limda 4 ta gol o‘tkazib yubordi. Kamiga bu “Liverpul”dan uchralgan eng yirik mag‘lubiyat bo‘ldi.

• Qayg‘uli raqamlarni keltirishda davom etamiz. “Manchester Yunayted” joriy mavsumda “Manchester Siti”ga 0:2 hisobida mag‘lub bo‘ldi. Mankunianliklar 2,5 yildan so‘ng ilk bor Manchester derbisida omadsizlikka uchradi.
• Sulsher transferlar uchun 458 million yevro sarfladi. Bu vaqt davomida birorta APL jamoasi transferlar uchun buncha ko‘p pul sarflamagan. Eng qimmat transfer — Harri Maguayr. Angliyalik himoyachi 87 million yevro evaziga xarid qilingan.
• Ole-Gunnar davrida “Manchester Yunayted” 138 million yevroga futbolchi sotgan. Eng qimmat sotilgan futbolchi — Romelu Lukaku. “Inter” belgiyalik hujumchi uchun 74 million yevro to‘lagan.
• Sulsher bilan “Manchester Yunayted” Premyer Liganing uy o‘yinlarida o‘tkazib yuborilgan gollar bo‘yicha antirekord o‘rnatdi. 2019/20-yilgi mavsumda jamoa 27 ta gol o‘tkazib yuborgan.
• Ole-Gunnar Sulsher Aleks Fergyusondan keyin “Manchester Yunayted”ni boshqargan beshinchi murabbiy bo‘ldi: Devid Moyes, Rayan Giggz, Lui van Gal va Joze Mourinyo norvegiyalik mutaxassisdan oldin jamoa murabbiyi bo‘lgan.
• Joriy mavsumda APL jadvalining kuchli beshligidan o‘rin olgan jamoalardan faqat bittasi Sulsher Angliyada ishlagan vaqtda sovrin yuta olmagan. “Chelsi” — Yevropa Ligasi, Chempionlar Ligasi, UEFA Superkubogi; “Liverpul” — APL, Chempionlar Ligasi, UEFA Superkubogi; “Manchester Siti” — APL (ikki marta), Angliya Kubogi, Liga Kubogi (ikki marta); “Arsenal” — Angliya Kubogi va Angliya Superkubogini qo‘lga kiritgan. Faqatgina “Vest Hem” 3 yil mobaynida birorta sovrin yuta olmadi. Ammo “bolg‘achilar” kuchli beshlikdan joy olganiga ko‘p vaqt bo‘lmadi.