“Ketgim kelmayapti onajon”, “Kelinchak” kabi qo‘shiqlarni ko‘pchilik O‘zbekistonda xizmat ko‘rsatgan artist Oxunjon Madaliyev tomonidan kuylangan deb o‘ylashadi.
Foto: “Daryo”
Bu qo‘shiqlarning asl muallifi, Oxunjon Madaliyevning shogirdi Rahmatillo Yusupov hisoblanadi. Xonanda Rahmatillo Yusupov ijod yo‘li, imiji, qo‘shiqlari Oxunjon Madaliyevga juda ham o‘xshagani sababli muxlislari uni “ikkinchi Oxunjon Madaliyev” deb e’tirof etishadi.
Xonanda Rahmatillo Yusupov “Daryo” muxbiri Feruz Muhammadga bergan intervyusida san’at olamiga kirib kelishi va Oxunjon Madaliyevga qanday qilib shogird bo‘lgani haqida gapirib berdi.
Biz rahmatli Oxunjon Madaliyev bilan bir qishloqdanmiz. Qishlog‘imizdagi bir to‘yda Oxun akam xizmatda bo‘lganlarida dadam rahmatli Oxun akamning yonlariga meni olib borib “o‘g‘lim sizning qo‘shiqlaringizni aytib tili chiqdi, endi buni shogirdlikka olasiz”, deganlar. Yoshimiz kattaroq bo‘lganidan so‘ng Oxunjon Madaliyevning uylariga olib borishgan. Uylariga borib kelib yurganmiz.
Ularning to‘ylari juda ham ko‘p bo‘lgani uchun ko‘pincha xizmatlarda bo‘lardilar. Shogirdlar ularning to‘ylarda yurish, turishlaridan ko‘p narsa o‘rganganmiz. Oxun akamning vodiydagi xizmatlariga birga borganmiz. U vaqtlarda qo‘shiqlar boshqacha bo‘lganmi yoki eshituvchilar boshqacharoq bo‘lganmi. Bilmadim. Bugungi kunda to‘ylarda xorij musiqalari, o‘yin-kulgi ko‘p bo‘ladi. Avvallari og‘ir, bosiq qo‘shiqlarni ko‘p eshitishardi. Hozir esa…
Rahmatillo Yusupov, xonanda
Xonanda Rahmatilla Yusupov “Ketgim kelmayapti onajon” va Kelinchak qo‘shiqlarining yaralishi tarixi haqida gapirdi.
Bundan yigirma yillar avval Farg‘onada bir tadbirda jurnalist akamiz “Ketgim kelmayapti onajon” qo‘shig‘ini aytdi. She’rni aytib bo‘lgach bu she’rni do‘stimiz Oxunjon qo‘shiq qilmoqchi edilar, nasib qilmagan ekan, she’rni ularning shogirdiga beramiz, dedilar. She’rni olib, uyga borib uni kuyga solib, muxlislarimizga taqdim etdim. Ijodkor odam so‘zga qarab, unga xarakter bera olishi kerak. So‘z dardli so‘z bo‘lgani uchun uning musiqasi ham, yo‘nalishi ham mungli bo‘lgan.
2003—2004-yillarda xalqimizning sevimli shoiri, akamiz Iqbol Mirzoning kitobini varaqlab “Kelinchak” she’rini ko‘rib qolganman. Akamizning juda ko‘p she’rlarini qo‘shiq qilganmiz, lekin bu she’rga ham alohida mehrim tushib qoldi. O‘sha vaqtlarda bunga o‘xshagan bosiq qo‘shiqlarim juda ham ko‘p bo‘lgani uchun, buni arxivimga olib qo‘ygandim. 2008-yilga kelib qo‘shiqni muxlislarga taqdim qilganmiz.
Rahmatillo Yusupov, xonanda
Ma’lumot uchun, “Ketgim kelmayapti onajon” qo‘shig‘ining so‘zi shoir va jurnalist Karim Bahriyevga tegishli.
Xonanda Rahmatillo Yusupov 1981-yil, 15-sentabr kuni, Farg‘ona viloyatida dunyoga kelgan. 100 dan ortiq mualliflik qo‘shiqlari bor. Oilali, ikki farzandning otasi.
