Qashqadaryo viloyati Qarshi tuman Obodonlashtirish boshqarmasi boshlig‘i singlisi rahbarligidagi fermer xo‘jaligiga gul ko‘chati buyurtma qilish bahonasida 149 million so‘m pul o‘tkazib, o‘zlashtirgani ma’lum bo‘ldi. Bu haqda Korrupsiyaga qarshi kurashish agentligi mas’uli Shodiyor Ahmedov ma’lum qildi, deya xabar berdi “Daryo” muxbiri.
“Qarshi tuman Obodonlashtirish boshqarmasi boshlig‘i o‘zining tug‘ishgan singlisi nomiga tashkil etilgan fermer xo‘jaligiga 149 million so‘mlik gul ko‘chatlarini buyurtma qilgan. Ammo mazkur fermer xo‘jaligi o‘rganilganda gul ko‘chati yetishtirishga mo‘ljallanmagani, qolaversa, bor-yo‘g‘i bir nafar ishchisi borligi aniqlangan. Mas’ullar esa soxta hujjat bilan fermer xo‘jaligiga pul o‘tkazgan. Eng yomoni mas’ul idora vakillari — Moliya hamda g‘aznachilik organlari qarindosh-urug‘lar o‘rtasida shartnoma imzolanganiga e’tibor ham bermagan. Shu sabab bu holatga prokuratura e’tiborini qaratdik. Ayni kunda holat bo‘yicha Qarshi tuman prokuraturasi tomonidan jinoyat ishi qo‘zg‘atilgan”, — deydi Korrupsiyaga qarshi kurashish yegentligi mas’uli Shodiyor Ahmedov.
Shuningdek, Shodiyor Ahmedovning ma’lumot berishicha, Qarshi shahar obodonlashtirish boshqarmasi mas’ullari tomonidan sakkizta holatda salkam 3,6 milliard so‘mlik, maktabgacha ta’lim tizimida 537 million so‘mlik, avtomobil yo‘llari boshqarmasida 561 million so‘mlik, Nishon tuman Obodonlashtirish boshqarmasida 975 million so‘mlik kamomadlarga yo‘l qo‘yilgan.
“Bu ro‘yxatni uzoq davom ettirish mumkin. Masalan Shahrisabz tuman hokimligida, Mirishkor, Qamashi tuman Obodonlashtirish boshqarmalarida, Qamashi tuman hokimligi-yu, Mirishkor tuman Mahalla va oilani qo‘llab-quvvatlash bo‘limida, Xalq ta’limi tizimi hamda viloyat televideniyesida davlat xaridlari to‘g‘risidagi qonunlar qo‘pol ravishda buzilgan”, — deydi Korrupsiyaga qarshi kurashish agentligi mas’uli.
Mas’ulning ta’kidlashicha, Shahrisabz tumanida 553 million so‘mlik kutubxona qurilishi bo‘yicha talabgorlar uchun tanlov e’lon qilingan va e’lon muddati tugamasdan turib, qurilish ishlari boshlab yuborilgani, hatto ishlar 45 foizga bitgani ma’lum bo‘lgan.
Avvalroq Qashqadaryoda ikki yilda mansabdorlarning 274 nafari ma’muriy, 217 nafari esa jinoiy javobgarlikka tortilgani, O‘zbekistondagi bog‘chalarda 9 oyda 6,6 mlrd so‘mlik ish haqi va tovarlar o‘zlashtirib yuborilgani, O‘zbekiston Ekologiya qo‘mitasi va uning tarkibidagi tashkilotlar 9,4 mlrd so‘mlik mablag‘ni noqonuniy sarflagani to‘g‘risida xabar berilgandi.
Izoh (0)