O‘zbekiston qamoqxonalardagi mahkumlar soni bo‘yicha dunyo mamlakatlari reytingida 62-o‘rinni egalladi. Bu haqda World Prison Brief bazasi ma’lumotlarida keltirilgan.
Dunyoning 223 ta mamlakatidagi mahkumlar soniga oid e’lon qilingan ma’lumotlarga ko‘ra, O‘zbekistonda hozirda 22 867 kishi qamoqda.
Reytingda yetakchilikni AQSh — 2 068 800 mahkum bilan (har bir 100 ming kishiga 629 nafar mahkum to‘g‘ri keladi) qo‘lga kiritilgan bo‘lsa, eng oxirgi pog‘onani hududida bitta ham mahkum bo‘lmagan San-Marino egallagan.
MDH davlatlari orasida Rossiya 5-o‘rin (471 mingdan ortiq mahkum), Turkmaniston 49-o‘rin (35 ming), Belarus (32 mingdan ortiq) Qozog‘iston 52-o‘rin (29 mingdan ortiq), Qirg‘iziston 96-o‘rin (10 mingdan ortiq)ni egallagan.
Eslatib o‘tamiz, 2020-yilning yanvarida Toshkent shahar IIBB “Panelniy” qamoqxonasidagi sharoitlar xalqaro standartlarga javob berishini ma’lum qilgandi. AQShning Xalqaro diniy erkinlik masalalari bo‘yicha komissiyasi 2021-yilning oktabrida O‘zbekistondagi diniy va siyosiy mahbuslar haqida hisobotini e’lon qilgandi. Hisobotda ta’kidlanishicha, mamlakatda prezident o‘zgargan 2016-yil oxiridan beri minglab mahbuslar ozod etilganiga qaramay, 2000 dan ziyod odam konstitutsiyaviy tuzumga tajovuz qilish, taqiqlangan adabiyotlarni saqlash yoki taqiqlangan guruhlarga a’zo bo‘lish kabi “mujmal va haddan tashqari keng talqin qilish mumkin bo‘lgan ayblovlar” bilan qamoqda qolmoqda.
Izoh (0)