Rossiya o‘zi bilan ittifoqdosh barcha davlatlarda rus tilida ta’lim berishga ixtisoslashgan maktablar tashkil etilishidan manfaatdor. Bu haqda mamlakat tashqi ishlar vaziri Sergey Lavrov chet elda yashovchi rossiyalik vatandoshlarning VII jahon kongressidagi chiqishida ma’lum qildi, deya xabar bermoqda “RIA Novosti”.
“Tojikistonda bizning metodologiyamizga asoslangan to‘liq dastur bo‘yicha o‘qitadigan beshta rus maktabi tashkil etilmoqda. O‘zbekiston uchun ham hozirda shunday dastur tayyorlanmoqda. Armanistonning yangi rahbariyati ham so‘nggi vaqtlarda Armaniston uchun ham xuddi shunday dastur ishlab chiqishga qiziqish bildirdi”, — dedi Lavrov, rus tilini targ‘ib etish masalalariga to‘xtalarkan.
Uning so‘zlariga ko‘ra, Moskva bu dastur barcha ittifoqchilar va strategik sheriklar uchun namunaviy loyihaga aylanishidan manfaatdor.
O‘zbekiston Xalq ta’limi vazirligi matbuot kotibi Laylo Rustamovaning “Daryo” so‘roviga javoban ma’lum qilishicha, vazirlikda ayni damda O‘zbekistonda rus tilida ta’lim berishga ixtisoslashgan yangi maktablarni ochish bo‘yicha ma’lumot mavjud emas.
Ma’lumot uchun, O‘zbekistonda 2020/2021 o‘quv yilida ta’lim faqat rus tilida olib boriladigan maktablar soni 81 tani tashkil etadi, ularda 634 985 nafar o‘quvchi ta’lim oladi. Taqqoslash uchun, 2007/2008 o‘quv yilida O‘zbekistonda ta’lim rus tilida olib boriladigan jami maktablar soni 739 tani tashkil etib, ularning 613 tasida ta’lim tili aralash (o‘zbek va rus tillarida), 126 tasida esa faqat rus tilida bo‘lgan.
Mavzuga doir:
Izoh (0)