Mansur Qilichev O‘zbekistonning Misrdagi yangi favqulodda va muxtor elchisi etib tayinlandi, deya xabar bermoqda Tashqi ishlar vazirligi matbuot xizmati.
Ma’lum qilinishicha, Mansur Qilichev Senatning 2021-yil 8-oktabrdagi tegishli qaroriga muvofiq O‘zbekistonning Misrdagi favqulodda va muxtor elchisi etib tayinlangan.
Qayd etilishicha, Mansur Qilichev diplomatiya sohasida 2002-yildan buyon ishlaydi. U vazirlik markaziy apparati va O‘zbekistonning xorijdagi diplomatik vakolatxonalarida faoliyat yuritgan. 2012–2013-yillarda O‘zbekistonning Saudiya Arabistonidagi elchixonasi birinchi kotibi bo‘lgan.
Bundan tashqari, u 2013–2019-yillarda O‘zbekistonning Dubay shahridagi (Birlashgan Arab Amirliklari) bosh konsuli bo‘lib ishlagan. 2019–2020-yillarda esa O‘zbekiston Xalqaro munosabatlar bo‘yicha axborot tahliliy markazi direktori o‘rinbosari — yig‘ma tahliliy bo‘lim boshlig‘i sifatida faoliyat olib borgan.
2020-yildan elchi lavozimiga tayinlangunga qadar u Tashqi ishlar vazirligi Konsullik-huquqiy departamenti direktori o‘rinbosari hisoblangan. Mansur Qilichev ingliz, arab va rus tillarini biladi.
Izoh (0)