Filippin prezidentligiga yana nomzodini qo‘ya olmaydigan davlat rahbari Rodrigo Duterte siyosatdan ketishga qaror qildi. Bu haqda Associated Press xabar berdi.
Avval 76 yoshli Dutertening vitse-prezident lavozimini egallashi mumkinligi taxmin qilingandi. Biroq prezident filippinliklarning ko‘pchiligi ushbu qarorga qarshi ekanligini aytgan va konstitutsiyaga qarshi chiqmoqchi emas.
Associated Press agentligining qayd etishicha, Dutertedan avval prezidentlik qilgan ikki rahbar muddatlari tugaganidan keyin nisbatan kamtarona lavozimlarni egallagan. Filippinning hozirgi prezidenti esa vitse-prezident lavozimini egallab, yangi rahbar sog‘lig‘idagi o‘zgarishlar tufayli boshqaruv qobiliyatini yo‘qotsa yoki vafot etadigan bo‘lsa, yana hukumatni o‘ziga bo‘ysundirishi mumkin.
Filippinda prezident olti yil muddatga saylanishi mumkin. Saylovlar 2022-yil may oyida o‘tkaziladi. Filippinlik taniqli bokschi Menni Pakyao mamlakat prezidentligiga o‘z nomzodini qo‘ygan.
Duterte Filippinda hokimiyat tepasiga kelganidan keyin giyohvand moddalar savdosiga qarshi keskin kurash boshlangan: reydlar oqibatida giyohvand moddalar tarqatgan minglab gumonlanuvchilar o‘ldirilgan.
2020-yil aprel oyida pandemiya sharoitida Duterte politsiyaning koronavirus cheklovlariga qarshi bosh ko‘targan namoyishchilarga qarata o‘q uzishiga ruxsat berilishi haqida gapirgan. 2021-yil may oyida u jamoat joylarida tibbiy niqobsiz yurgan yoki uni noto‘g‘ri taqib olgan fuqarolarni hibsga olish kerakligini aytgandi.
Izoh (0)