Toshkent metropolitenining poyezdlaridan birida kuzatilgan nosozlik sabab yo‘lovchilar bekatda tushirib qoldirildi. Bu haqda poytaxt metropoliteni matbuot xizmati xabar berdi.
Ma’lum qilinishicha, 27-sentabr kuni soat 10:20 atrofida “Xalqlar do‘stligi” bekatidan harakatlanishi lozim bo‘lgan 3-yo‘nalishdagi harakat tarkibida texnik nosozlik aniqlangan. Harakat xavfsizligini ta’minlash maqsadida yo‘lovchilar bekatda tushirilgan. Harakat tarkibi texnik ko‘rik punktiga jo‘natilgan.
“Keltirilgan noqulayliklar uchun yo‘lovchilardan uzr so‘raymiz”, — deyiladi xabarda.
Eslatib o‘tamiz, 22-sentabr kuni Toshkent metropolitenining Chilonzor yo‘nalishida joylashgan “Xalqlar do‘stligi” bekatida poyezd vagonlaridan birining eshigida nosozlik kuzatilgan edi.
Qayd etish joizki, mart oyidan buyon Toshkent metropoliteni bilan bog‘liq shu kabi voqealar tez-tez yuz bermoqda. Xususan, 18-mart kuni “Olmazor” (Chilonzor yo‘li) va “Bekat-1” (Sergeli yo‘li) orasidagi tunnelda ikki poyezd to‘qnashgandi.9-aprel kuni ijtimoiy tarmoqlarda poyezdning ochiq eshiklar bilan harakati tushirilgan video tarqaldi. Shu bilan birga, metropolitendagi yerosti va yerusti poyezd harakatlarining bir nechta boshqa videolari ham ijtimoiy tarmoqlarda ko‘p bora muhokama qilindi. 28-aprel kuni esa tunnelda to‘xtab qolgan poyezd haqidagi video tarqaldi, unda yo‘lovchilar relslar orqali harakatlanib, bekatga yetib olgani tasvirlangan. 13-may kuni “Amir Temur xiyoboni” bekatida barcha yo‘lovchilar tushirib yuborilgandi. 20-iyun kuni “Olmazor” bekatida ham xuddi shu kabi holat yuz bergan, 28-avgust kuni Toshkent metrosi poyezdida kuzatilgan nosozlik sabab yo‘lovchilar “Toshkent” bekatida tushirib qoldirilgan, 20-sentabr kuni esa Toshkentda metro poyezdi “G‘ofur G‘ulom” bekatida to‘xtab qolgandi.
Izoh (0)