21-sentabr kuni Oliy Majlis Senati raisi Tanzila Norboyeva Qirg‘izistonga rasmiy tashrifi doirasida Qirg‘iziston prezidenti Sadir Japarov bilan uchrashdi. Bu haqda Parlament yuqori palatasi matbuot xizmati xabar berdi.
Ma’lum qilinishicha, Qirg‘iziston prezidenti mustaqillikning 30 yilligi nishonlanayotgan kunlarda amalga oshirilgan ushbu tashrifning ahamiyati va muhimligini qayd etgan. Shuningdek, u qardosh o‘zbek xalqini mamlakat mustaqilligining 30 yilligi bilan tabriklagan.
Tomonlar munosabatlarning bugungi holati va istiqbollari, shu jumladan, parlamentlararo va mamlakatlar o‘rtasidagi hamkorlikning huquqiy asoslarini mustahkamlash masalalarini muhokama qilgan.
“Prezident Sadir Japarov do‘stlik, ahil qo‘shnichilik va strategik hamkorlik tamoyillariga asoslangan Qirg‘iziston—O‘zbekiston munosabatlari yuksak darajaga yetganini mamnuniyat bilan qayd etdi. Ikki davlat rahbarlarining ochiq va ishonchli aloqalari O‘zbekiston va Qirg‘iziston o‘rtasidagi do‘stona munosabatlarni mustahkamlashning muhim asosi ekanini ta’kidladi. Shu nuqtayi nazardan Prezident Sadir Japarov ikki tomonlama hamkorlikda joriy yilning mart oyida Toshkentga amalga oshirgan davlat tashrifi muhimligini qayd etdi”, — deyiladi xabarda.
Qirg‘iziston rahbari O‘zbekistonda prezident saylovini muvaffaqiyatli o‘tkazib olishni tilab, Prezident Shavkat Mirziyoyevning Markaziy Osiyoda hamkorlikni mustahkamlashga qaratilgan tashabbuslarini to‘la qo‘llab-quvvatlashini bildirgan.
Shuningdek, Sadir Japarov O‘zbekistonning gender siyosatini amalga oshirish, xotin-qizlar huquqlarini ta’minlash borasidagi sa’y-harakatlari, shu jumladan, “Markaziy Osiyo yetakchi ayollari muloqoti” tashabbusiga yuqori baho bergan. Shu kunlarda bo‘lib o‘tayotgan “Qirg‘iziston va O‘zbekiston tadbirkor ayollari muloqoti” biznes-forumiga muvaffaqiyat tiladi va bunday loyihalarni har tomonlama qo‘llab-quvvatlashga tayyorligini bildirgan.
Tanzila Norboyeva samimiylik va mehmondo‘stlik uchun Qirg‘iziston tomoniga chin dildan minnatdorlik bildirgan. Senat rahbari Prezident Shavkat Mirziyoyevning samimiy tabrigi va ezgu tilaklarini yetkazgan hamda O‘zbekiston rahbari ham Qirg‘izistonda amalga oshirilayotgan islohotlarni to‘la qo‘llab-quvvatlashini bildirgan.
Shuningdek, boshqa masalalar yuzasidan ham fikr almashildi.
Eslatib o‘tamiz, Prezident Shavkat Mirziyoyev 6-avgust kuni Markaziy Osiyo davlatlari rahbarlarining Maslahat uchrashuvi doirasida Qirg‘iziston prezidenti Sadir Japarov bilan muzokara o‘tkazgan edi.
Izoh (0)