Namanganda aka ukasini do‘pposlagan yigitni pichoqlab, o‘ldirib qo‘ydi. Bu haqda “Daryo” muxbiri Azizbek Abduvaliyev xabar bermoqda.

Voqea 2021-yil 6-sentabr kuni To‘raqo‘rg‘on tumani, Shahand qishlog‘ida yuz bergan. Shu kuni soat 08:30 atrofida 1992-yilda tug‘ilgan Bahodir Aliyev (ism-shariflar o‘zgartirilgan) o‘zaro tortishuv tufayli o‘zidan ikki yosh kichik Javohir Ahmedovni urib, unga tan jarohati yetkazadi.

Voqea joyiga Javohirning 31 yoshli akasi yetib keladi. U Bahodir Aliyevning ko‘krak va yelkasiga o‘zi bilan olib kelgan oshxona pichog‘i bilan ikki marta urib, qasddan o‘ldiradi.

Respublika shoshilinch tibbiy yordam ilmiy markazi To‘raqo‘rg‘on tumani filialining dastlabki ma’lumotnomasida Bahodir Aliyevning o‘limi tashqi va ichki qon ketishi hamda nafas yetishmovchiligi oqibatida kelib chiqqani ko‘rsatilgan.

Ushbu holat bo‘yicha tuman prokuraturasi tomonidan jinoyat ishi qo‘zg‘atilib, qotillikni sodir etgan shaxs qo‘lga olindi.

Mazkur holat yuzasidan Namangan viloyati IIB boshlig‘i Odil Otaxo‘jayev va tuman hokimi Zulayho Mahkamova ishtirokida muhokama yig‘ilishi o‘tkazildi. Unda yuz bergan hodisa tahlil qilinib, uning kelib chiqishiga aslida kichik bir kelishmovchilik va tushunmovchilik sabab bo‘lgani aytib o‘tildi. Bu kabi jinoyatlar sababi o‘rganilganda aksariyati muqim ish o‘rniga ega bo‘lmagan, notinch oilalarda yashayotgan fuqarolar tomonidan sodir etilayotgani ta’kidlandi va mas’ullar ogohlikka chaqirildi.