Shimoliy Koreya yetakchisi Kim Chen Inning internetda chop etilgan so‘nggi foto va videotasvirlari keng muhokama qilinmoqda. Kadrlar Kimning sog‘lig‘i haqida yangi mish-mishlarga sabab bo‘ldi, deb yozadi Daily Mail.
Internetda Shimoliy Koreya rahbarining foto va videotasvirlari u Pxenyandagi “qiyin va murakkab” sohalarda ishlash uchun “ko‘ngilli ravishda” da’vogar bo‘lib chiqqan talabalar va maktab o‘quvchilari bilan uchrashuv o‘tkazganidan so‘ng paydo bo‘ldi. Shimoliy Koreya davlat ommaviy axborot vositalari tomonidan e’lon qilingan fotosuratda davlat rahbarining juda ozib ketganini ko‘rish mumkin.
Kim Chen In o‘z nutqi chog‘ida yoshlarni ixtiyoriy ravishda eng qiyin va og‘ir vazifalarni bajarishga rozi bo‘lgani uchun maqtadi va ularni har tomonlama qo‘llab-quvvatlashini aytdi.
“Inqilob qilayotgan partiyaning ishonchli vorislari, zaxiralari va istiqbolli asosiy kuchi bo‘lish — bu eng katta g‘urur, boylik va taraqqiyot tomon harakatlantiruvchi kuch”, — dedi Kim.
“Albatta, katta ehtimol bilan u kasal bo‘lishi mumkin. Balki u vaznini kamaytirish uchun va sog‘lig‘ida semizlik bilan bog‘liq muammolarning oldini olish maqsadida bariatrik jarrohlik (oshqozonni kichraytirish)ni boshdan o‘tkazgandir”, — dedi Avstraliyaning Dikin universiteti terrorizmga qarshi kurash bo‘yicha mutaxassisi Greg Barton.
Iyun oyining oxirida KXDR davlat matbuoti mamlakat rahbarining vazn yo‘qotganini rasman tan oldi. Shuningdek, Janubiy Koreya nashrlarida qayd etilishicha, uning bo‘yi 170 santimetrni, vazni 140 kilogrammni tashkil etgan, bu 30-40 yoshli odamlar uchun me’yordan oshiq bo‘lib, qandaydir kasallik mavjudligidan dalolat berishi mumkin.
Kimning sog‘lig‘i yuzasidan ommaga kamdan kam beriladigan izohlar iyun oyining boshida xorijiy tahlilchilar KXDR yetakchisi ozib ketganini qayd etganidan keyin paydo bo‘ldi. Kim Chen Inning sog‘lig‘i haqidagi mish-mishlar 2020-yil boshida kuchaygan.
Avgust boshida Kim Chen Inning boshidagi dog‘lar uning sog‘lig‘i haqida yana bir munozaraga sabab bo‘lgandi.
Izoh (0)