Yangihayot tumani o‘z logotipiga ega ilk tumanga aylandi
2020-yilda Toshkent shahridagi 12-tumanga aylangan Yangihayot O‘zbekistondagi o‘z logotipiga ega bo‘lgan ilk tuman bo‘ldi. Bu haqda tuman hokimligi axborot xizmatiga tayanib, “Xalq so‘zi online” xabar berdi.
Ta’kidlanishicha, mazkur logotip mualliflik huquqiga ega hisoblanadi.
“Qisqacha qilib aytganda, yangi tuman yangi O‘zbekistonning yangi hayotini o‘zida mujassam etishga, har ishda kreativ, birinchi va mas’uliyat bilan yondashishga bel bog‘lagan. Tuman o‘z imijini yaratarkan, ushbu logotipni ko‘rganingizda yangi bir hayot, sifat, farovonlik va mas’uliyat esingizga tushishini maqsad qilgan”, — deyiladi tuman hokimligi matbuot xizmati xabarida.
Tuman logotipi o‘ziga xos ma’noga ega bo‘lib, unda Yangihayot so‘zidagi ikki kalit harf – “Y” va “h” ifodalangan. Ushbu harflar moviy va zangori ranglarda bo‘lib, ular yangi, toza, sof hayotni bildiradi. Logotip shaklida o‘tkir va chorak aylana kesishuvlaridan foydalanilgan. Bu uslub ham sharqona, ham zamonaviy minimalistik uslubni o‘zida mujassamlashtirgani bilan e’tiborga loyiq. Shuningdek, harflar shakli yaproqlarni eslatadi. Yaproqlar esa katta bir daraxt bo‘lib, tuman O‘zbekistonning bir bo‘lagi ekanini anglatadi.
Eslatib o‘tamiz, Yangihayot tumani Oliy Majlis Qonunchilik palatasi va Senatining 2020-yil sentabrdagi tegishli qarorlari asosida tashkil etilgan. Ma’lumot uchun, Yangihayot tumani maydoni poytaxt va Toshkent viloyatidagi 6 tuman hududi hisobiga kengaytirilgan.
