Toshkentda o‘qotar qurol saqlagan shaxs aniqlanib, qamoqqa olindi

Toshkent shahrida jangovar revolver saqlagan shaxs aniqlandi, deya xabar bermoqda poytaxt IIBB matbuot xizmati.

Olmazor tumani IIO FMB terrorizm va ekstremizmga qarshi kurash bo‘limi xodimlari tomonidan tumanda olib borilgan profilaktik tadbirlar davomida ma’lum bo‘lishicha, tumanda yashovchi 37 yoshli O.Sh. qurilish komplekslaridagi ta’mirlash ishlari vaqtida buzilgan devor orasida qurol topib, tanishi 57 yoshli X.G.ga berib yuborgan.

X.G.ning uyi ko‘zdan kechirilganda xodimlar o‘qotar qurol – 1917-yilda ishlab chiqarilgan “Nagan” (7,62 millimetr) jangovar revolveri va 14 ta o‘q topgan. Qurol va aslahalar ashyoviy dalil sifatida xolislar guvohligida olib qo‘yilgan.

X.G.ga nisbatan Jinoyat kodeksining 248-moddasi 1-qismi (qurol, o‘q-dorilar, portlovchi moddalar yoki portlatish qurilmalariga qonunga xilof ravishda egalik qilish) bo‘yicha jinoyat ishi qo‘zg‘atilib, qamoqqa olish ehtiyot chorasi qo‘llanilgan. Tergovoldi tekshiruvlari o‘tkazilmoqda.

Ma’lumot uchun, Jinoyat kodeksining 248-moddasiga ko‘ra mazkur jinoyatni sodir etgan shaxslarga nisbatan sud tomonidan 20 yilgacha qamoq jazosi qo‘llanilishi mumkin.