O‘zbekiston Respublikasining Vladivostok shahridagi Bosh konsulxonasi xodimlari tomonidan Primorsk o‘lkasi Nadejdenskiy tumanida qurilayotgan turar joylar qurilishida ishlash uchun Surxondaryodan kelgan 30 nafarga yaqin fuqarolarning murojaatidan so‘ng, mazkur qurilish obyektida mehnat migrantlari va ish beruvchi ishtirokida uchrashuv o‘tkazildi.
Ma’lum bo‘lishicha, ushbu qurilish obyektiga o‘zbekistonliklar ishlash uchun tanishlari orqali kelgan. Ishni boshlagandan so‘ng, ularning pasportlari ish beruvchi tomonidan patent rasmiylashtirish uchun olingan va o‘z vaqtida qaytarib berilmagan. 8 nafar fuqaro boshqa ishga o‘tishini bildirganda ish beruvchi ularning ishdan ketishiga qarshilik ko‘rsatgan.
Uchrashuvda ish beruvchi va mehnat migrantlari ishtirokida ushbu masalalar muhokama qilinib, fuqarolarning hujjatlari qaytarib berildi. Ishdan ketmoqchi bo‘lganlarga ruxsat berish bo‘yicha kelishib olindi.
Shuningdek, xorijda ishlayotgan mehnat migrantlarini ijtimoiy-huquqiy va moddiy qo‘llab-quvvatlash, xavfsiz mehnat migratsiyasini ta’minlash bo‘yicha amalga oshirilayotgan ishlar haqida batafsil ma’lumotlar berildi. 2021-yil oktabr oyida bo‘lib o‘tadigan Prezident saylovida faol ishtirok etishga chaqirildi.
Ish beruvchiga O‘zbekiston fuqarolarini ishga jalb qilish uchun Tashqi mehnat migratsiyasi agentligi hamda xususiy bandlik agentliklari bilan hamkorlik o‘rnatishi tavsiya etildi.
Bundan avval Senat Rossiyaga ishlash uchun ketgan o‘zbekistonliklarning videomurojaati yuzasidan o‘rganish natijalarini e’lon qilgani, Rossiyada bo‘lib turgan o‘zbekistonliklar ommaviy mushtlashuv bilan bog‘liq holatlar ko‘paygani sabab ogohlikka chaqirilgani hamda Rossiyada ikki oyog‘idan ayrilib, xotirasini qisman yo‘qotgan ayol O‘zbekistonga qaytarilgani haqida xabar berilgandi.
Izoh (0)