Buxoroda bosqinchilik yo‘li bilan nogiron fuqaroning mol-mulkini talon-toroj qilgan yoshlarga sud hukmi o‘qildi

Buxoro viloyatining G‘ijduvon tumanida yashovchi nogiron fuqaroning xonadoniga bosqinchilik yo‘li bilan kirib, uning oilasini o‘ldirish bilan qo‘rqitgan va mol-mulkini talon-toroj qilgan yoshlarga sud hukmi o‘qildi. Bu haqda “Daryo”ga Jinoyat ishlari bo‘yicha G‘ijduvon tuman sudi raisi Bobur Umarov ma’lum qildi.

Jinoiy til biriktirgan yoshlar xonadon egasini qo‘rqitish va qarshiligini yengish uchun pichoqlar bilan qurollanib, qora rangli futbolkalar bilan niqoblangan. Uyga bostirib kirgan yoshlar cho‘chib uyg‘ongan uy a’zolaridan pul talab qila boshlagan. Mulklarini bermasa, o‘ldirishi mumkinligini aytgan.

Salohiddin Salimovning turmush o‘rtog‘i boshqa divanda yotgan va qo‘rquvdan chinqirib yuborgan o‘g‘lini ovutish uchun uning oldiga borayotganda, niqobdagi shaxslarning biri ayolni siltab, o‘z o‘rniga qaytib o‘tirishga majburlagan va pichog‘i bilan unga tahdid qilgan. Oyog‘i protez qilingan va qo‘ltiqtayoqsiz yurolmaydigan uy egasi niqobli shaxslarga darvozaxonada turgan Gentra’si yukxonasida pul borligini, ularning hammasini olib ketib, oilasi va farzandlariga ziyon yetkazmasligini so‘ragan.

Ikki nafar niqobli shaxs avtomashina yukxonasida bo‘lgan jami 12,5 million so‘m pulni olgan. Qolgan ikki nafar shaxs esa uy egasidan tilla taqinchoqlarni ham so‘ragan. Shunda uy egasining xotini qolgan barcha pul va tilla taqinchoqlari bankda garovda ekanligini aytgan. Biroq bundan kifoyalanmagan yoshlar yotoqxonada bo‘lgan jami bahosi 8 million so‘mga teng bir dona Samsung S7 va bir dona Samsung S10 rusumli telefon apparatlarini ham olib, yo‘l chetida o‘zlarini kutib turgan va davlat raqam belgisi berkitilgan Damas’ga o‘tirib, zudlik bilan ko‘zdan g‘oyib bo‘lgan.

Noma’lum shaxslar chiqib ketgach, oradan bir necha daqiqa o‘tib uy egasi qaynotasiga qo‘ng‘iroq qilib, bo‘lgan voqealarni aytgan. Qaynota bu haqda ichki ishlar idoralariga ma’lum qilgan va holat yuzasidan qidiruv-surishtiruv ishlari boshlab yuborilgan. Dastlabki tergov organi tomonidan olib borilgan izlanishlarga ko‘ra, Salohiddin Salimovning xonadoniga yaqin kanal bo‘yidan bir dona plastmassadan yasalgan qora dastali oshxona pichog‘i, qurol o‘rnida ishlatilgan ikki dona yog‘och va ikki dona karton qog‘oz bo‘laklari, bir dona yaroqsiz holga keltirilgan Nokia 1208 uyali telefon apparati topilgan.

“Bosqinchilik holatini sodir etgan shaxslar voqeadan 15 kun o‘tib qo‘lga olinganda, ular besh nafar ekani va barchasi ham vaqtincha ish bilan band bo‘lmagan yoshlar ekani oydinlashgan. Ularning eng kattasi 25 yoshda bo‘lib, ular ushbu o‘g‘rilikda ishtirok etishni istamagan 19 yoshli yigitni ham qistov yo‘li bilan shu yo‘lga boshlashgan. Achinarlisi, bosqinchilikda o‘ziga belgilangan ishtirokchilik vazifasini bilib-bilmay bajargan M.H.ga arzimagan pul berib, ‘gullab qo‘ysa’ o‘zi ham jabr ko‘rishi mumkinligiga ishora qilishgan”, — deydi Jinoyat ishlari bo‘yicha G‘ijduvon tuman sudi sudyasi Boborahim Ochilov.

Sud hay’ati ish bo‘yicha jabrlanuvchi fuqaroga yetkazilgan moddiy va ma’naviy zararlarni qoplash yuzasidan qaror chiqargan hamda jinoyatni sodir etgan shaxslarga nisbatan hukm e’lon qilgan.

Sud hukmiga ko‘ra, Akbar Jinoyat kodeksining 164-moddasi 3-qismining “v” bandi (bosqinchilik) bilan aybli deb topilgan va unga nisbatan 13 yil muddatga ozodlikdan mahrum qilish jazosi tayinlangan. Shu modda bilan ayblanuvchi Sherali ham 12 yil muddatga, Ravshan va Marat 11 yilga ozodlikdan mahrum qilingan. Ularning jazoni umumiy tartibli koloniyalarda o‘tashi belgilangan. Mahmud esa Jinoyat kodeksining 241-moddasi 1-qismida nazarda tutilgan (jinoyat haqida xabar bermaslik yoki uni yashirish) jinoyatni sodir etganlikda aybli deb topilgan va unga 3 yil muddatga ozodlikni cheklash jazosi tayinlangan.