Buxoro viloyati Sog‘liqni saqlash boshqarmasi boshlig‘i G‘afur Saidov salomatligi yomonlashgani sababli lavozimni tark etdi. Bu haqda viloyat hokimi o‘rinbosari Mirali Hamroyev o‘tkazgan yig‘ilishda ma’lum qilindi, deya xabar bermoqda “Daryo” muxbiri.
Ta’kidlanishicha, 2021-yilning 10-iyul kuni boshqarmada viloyat hokimi o‘rinbosari ishtirokida yig‘ilish bo‘lib o‘tgan. Yig‘ilishda Mirali Hamroyev G‘afur Saidovning salomatligi tufayli ishdan bo‘shayotgani haqidagi sog‘liqni saqlash vazirining buyrug‘ini o‘qib eshittirgan.
G‘afur Saidov boshqarma boshlig‘i lavozimiga tayinlanguniga qadar ishlagan joyi — Respublika ixtisoslashtirilgan onkologiya va radiologiya ilmiy-amaliy tibbiyot markazi Buxoro filiali direktori lavozimiga o‘tkazilgan.
Viloyat Sog‘liqni saqlash boshqarmasi boshlig‘i vazifasini vaqtincha bajaruvchi etib, ayni damgacha boshqarma boshlig‘ining birinchi o‘rinbosari lavozimida ishlab kelgan Asqar Bahronov tayinlangan.
Eslatib o‘tamiz, G‘ofur Saidov 2020-yilning iyul oyida viloyat Sog‘liqni saqlash boshqarmasi boshlig‘i lavozimiga tayinlangan edi.