Toshkentda 2-iyul kuni texnika fanlari doktori, professor, silikatli qiyin eruvchan nometall materiallar texnologiyasi va noorganik moddalar texnologiyasi sohasidagi taniqli olim Temurjon Otaqo‘ziyev 85 yoshida vafot etdi, deb xabar beradi “Gazeta.uz”.
Temurjon Otaqo‘ziyev O‘rta Osiyo politexnika institutining kimyo-texnologiya fakulteti va O‘zSSR Fanlar akademiyasi Kimyo institutida aspiranturani tamomlagan. 1964—1967-yillarda Kimyo institutida ishlagan, 1968-yildan boshlab Toshkent politexnika institutida (hozirgi Toshkent davlat texnika universiteti) faoliyat ko‘rsata boshlagan. Bu yerda u katta o‘qituvchilikdan kafedra mudiri, dekan va o‘quv ishlari bo‘yicha prorektor lavozimiga qadar yo‘llarni bosib o‘tgan.
So‘nggi yillarda Toshkent kimyo-texnologiya institutida professor bo‘lib ishlayotgan edi. Temurjon Otaqo‘ziyev qator afzalliklari bilan ajralib turadigan yangi sement turini yaratishga qo‘shgan mehnati bilan mashhur.
Uning tadqiqot yo‘nalishlaridan biri sanoat chiqindilarini utilizatsiya qilishga qaratilgan edi. Xususan, u qurilish materiallari — sement, gidravlik qo‘shimchalar va boshqa materiallarni ishlab chiqarishda fosfor gipsni utilizatsiya qilishning optimal variantini topgan.
Temurjon Otaqo‘ziyev — 1000 dan ortiq ilmiy ishlar muallifi. Ular orasidan monografiyalar, darsliklar va qo‘llanmalar, terminologik va izohli lug‘atlar, ilmiy-ommabop risolalar, ixtirolar uchun patentlar va mualliflik guvohnomalari o‘rin olgan. Uning rahbarligida 42 fan nomzodi va 7 fan doktori himoya qilgan.
2007-yilda Temurjon Otaqo‘ziyev “Buyuk xizmatlari uchun” ordeni bilan taqdirlangan edi.
Avvalroq O‘zbekiston Fanlar akademiyasi akademigi Mirhoji Asqarov 89 yoshida, akademik Ra’no Ubaydullayeva 84 yoshida, akademik Shavkat Akmalxonov 87 yoshida vafot etgani to‘g‘risida xabar berilgandi. Shuningdek, O‘zbekiston Respublikasi Fanlar akademiyasi akademigi, adabiyotshunos olim To‘ra Mirzayev 2020-yil 29-sentabr kuni 84 yoshida, O‘zbekistonda xizmat ko‘rsatgan fan arbobi, O‘zbekiston Respublikasi Fanlar akademiyasi akademigi Tursunboy Rashidov 7-oktabr kuni 86 yoshida vafot etgandi.
Izoh (0)