Toshkentda tibbiy niqobga giyohvandlik vositasini yashirgan fuqaro qo‘lga olindi

Toshkent shahrida yonidan giyohvand moddalar topilgan Cobalt haydovchisi ushlandi, deya xabar bermoqda shahar IIBB.

Ma’lum qilinishicha, 2021-yil 26-iyun kuni taxminan soat 05:30 da “Sharq” YPX postida Toshkent shahar IIBB xodimlari maxsus “Qoradori-2021” tadbiri doirasida poytaxtga kirmoqchi bo‘lgan Cobalt avtomobilini to‘xtatgan.

Tekshiruv natijasida transport vositasi haydovchisi – Farg‘ona viloyatidan bo‘lgan A.K. (1984-yilda tug‘ilgan)ning yonidan tibbiy niqobga o‘ralgan jigarrang o‘ziga xos hidli modda topilib, xolislar guvohligida olib qo‘yilgan.

Tegishli hujjatlar rasmiylashtirilgach, fuqaro Bektemir tumani IIO FMBga yetkazildi.

Bundan avval DXX Buxoro, Farg‘ona va Namangan viloyatlarida giyohvand moddalar savdosi bilan shug‘ullangan bir necha shaxsni qo‘lga olgani, Chilonzorda chamadoniga giyohvand modda yashirib olib ketayotgan Tojikiston fuqarosi ushlangani hamda Chilonzorda go‘sht ichiga giyohvand modda joylashtirib olib ketayotgan shaxs qo‘lga olingani haqida xabar berilgandi.