Farg‘ona viloyatining Toshloq tumanida qalbaki 100 va 50 dollarlik kupyura tayyorlab, uni muomalaga kiritmoqchi bo‘lgan shaxs ushlandi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, 2021-yilning 24-aprel kuni Toshloq tumanida noma’lum shaxs Redmi rusumli telefon apparatini 1 million 550 ming so‘mga sotib olishga kelishgan. To‘lov uchun qalbaki usulda tayyorlangan 1 donadan 50 va 100 dollarlik kupyuralarni berib, telefon apparatini olib, hodisa joyidan yashiringan. Bu haqda sotuvchi IIBga ariza bilan murojaat qilgan.O‘tkazilgan sudga oid texnik-kriminalistik ekspertizaning xulosasiga ko‘ra, 1 dona 100 dollar va 1 dona 50 dollar qiymatidagi kupyura qalbaki usulda rangli printer yordamida tayyorlanganligi aniqlangan.
Mazkur holat yuzasidan Toshloq tumani IBB huzuridagi tergov bo‘limi tomonidan Jinoyat kodeksining 176-moddasi 1-qismi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilgan.
Olib borilgan tergovga qadar tekshiruv davomida qalbaki kupyura J.R. tomonidan tayyorlanganligi aniqlanib, unga nisbatan sud tomonidan qamoqqa olish tarzidagi ehtiyot chorasi qo‘llanilgan.
Izoh (0)