Kospet kompaniyasi o‘zining yangi Optimus 2 “aqlli” soatlarini 250 dollar qiymatida taqdim etadi, ammo dastlabki xaridorlarga u chegirma bilan 180 dollar evaziga sotiladi, deb xabar beradi IXBT.
Kospet Optimus 2 soatiga metall hoshiya bilan o‘ralgan 1,6 dyuymli IPS displey o‘rnatilgan. Bu 13 megapikselli buriladigan kamera o‘rnatilgan dunyodagi birinchi “aqlli” soat hisoblanadi. Kamera chaqnoq bilan jihozlangan bo‘lib, u fonar vazifasini bajara oladi, shuningdek, 1080p sifatli videoni tasvirga olish imkonini beradigan Sony IMX214 datchigi ham mavjud. Uni 90 darajaga burgan holda videoaloqa yoki oddiy foto va video yaratishda foydalanish mumkin.
Kospet Optimus 2’ga bir kristalli MediaTek Helio P22 tizimi va PixArt PAR2822 chipi o‘rnatilgan. SoC Helio P22 barcha intellektual va murakkab ma’lumotlarni qayta ishlaydi, PixArt esa Bluetooth ulanish, shuningdek, sport ma’lumotlarini yig‘ish va qayta ishlashni optimallashtirishga xizmat qiladi. Bu ishonchli va barqaror ulanishni, kam energiya sarflanishini va avtonomlikning oshishini ta’minlaydi.
“Aqlli” soatlardan ikki xil rejimda foydalanish mumkin: Android va Lite rejimida. Android rejimi barcha funksiya va dasturlarni ishga tushirsa, Lite faqat qo‘ng‘iroqlarni amalga oshirish, SMS yuborish va jismoniy faollikni kuzatadi.
Soatlarga sig‘imi 1250 mA/soatga teng litiy-polimerli batareya o‘rnatilgan bo‘lib, u Lite rejimida 5 kun avtonom ishlashni, Android rejimida esa 2 kun ishlashni ta’minlaydi. Soatlarga 4 gigabayt tezkor va 64 gigabayt ichki xotira o‘rnatilgan. “Aqlli” soatlar hech qanday muammosiz uch o‘lchamli onlayn o‘yinlarni ishga tushira oladi, katta hajmdagi fayl va tasvirlarni saqlaydi.
Soatlar 30 dan ortiq sport rejimini qo‘llab-quvvatlab, 24/7 rejimda qondagi kislorod miqdorini o‘lchaydi. Kospet Optimus 2 Android 10,7 yordamida boshqariladi, GPS, 4G, Vo-LTE funksiyalariga ega.
Avvalroq Xiaomi kamera, 4G va keng sig‘imli akkumulyatorga ega “aqlli” soatini 60 dollardan arzonroqqa sotishni boshlagani to‘g‘risida xabar berilgandi.
Izoh (0)