Samarqand viloyati Urgut tumanida otasining mashinasini ruxsat so‘ramasdan minib chiqqan yigit avariyaga uchradi, deb xabar beradi viloyati IIB YHXB axborot xizmati.
Ma’lum qilinishicha, 30-may kuni Urgut tumani “Bahrin” mahallasi hududidan o‘tuvchi M39 yo‘lining 1112-kilometrida 19 yoshli haydovchi boshqaruvidagi Nexia qarama-qarshi yo‘nalish bo‘ylab kelayotgan boshqa bir Nexia bilan to‘qnashuv sodir etgan.
Yo‘l-transport hodisasi oqibatida Nexia ichidagi yo‘lovchi og‘ir tan jarohatlarini olib, voqea joyida vafot etgan.
“Sheriklarim bilan toqqa dam olgani chiqish maqsadida uydagilardan mashinani so‘roqsiz olib chiqqandim. Tezlikni oshirganim uchun qarama-qarshi yo‘nalishga chiqib ketib, mashinaga urildim. Tushib, yonimdagi odamga yordam bermoqchi edim, afsuski u hayotdan ko‘z yumdi”, — deydi Nexia haydovchisi.
Ta’kidlanishicha, marhum yo‘lovchining uch nafar farzandi yetim qolgan.
Avvalroq Urgutda radiatoriga suv quyish uchun tushgan haydovchining “Gazel”i jarlikka tushib ketgani, Qarshida beton to‘siqdan “sakragan” “Jiguli” qarama-qarshi yo‘nalishda harakatlanib kelayotgan Nexia’ga urildgani, Samarqandda Lacetti bilan to‘qnashgan “Jiguli” haydovchisi vafot etgani to‘g‘risida xabar berilgandi.
Izoh (0)