Everest cho‘qqisiga ko‘tarilgan o‘zbekistonlik alpinist Sergey Denisenko 8-iyun kuni Toshkent xalqaro aeroportida tantanali ravishda kutib olindi. Prezident matbuot xizmatining ma’lum qilishicha, Shavkat Mirziyoyevning tegishli farmoni bilan Sergey Denisenko “O‘zbekiston iftixori” faxriy unvoni bilan taqdirlangan.
E’lon qilingan kadrlardan ko‘rish mumkinki sportchiga mukofotni O‘zbekiston Prezidentining yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisi Abdujabbor Abduvohidov topshirgan.
Shuningdek, o‘zbekistonlik alpinistga Trailblazer avtomobili ham sovg‘a qilingan.
Eslatib o‘tamiz, o‘zbekistonlik alpinist Sergey Denisenko 1-iyun kuni Everest (Jomolungma) cho‘qqisiga ko‘tarilgandi. Qayd etilishicha, bu Nepal tomonidan o‘zbekistonlik alpinistning birinchi marta Everest cho‘qqisiga chiqishi. Everestga ko‘tarilishning ushbu mavsumi anomal va nobarqaror ob-havo sharoitiga to‘g‘ri kelgan. Ekspeditsiya taxminan 2 oy davom etgan. Cho‘qqiga chiqish O‘zbekiston mustaqilligining 30 yilligiga bag‘ishlangan.
Mavzuga doir: Foto: Everest cho‘qqisidagi O‘zbekiston bayrog‘i va Shavkat Mirziyoyev surati
Izoh (0)