Peruda koronavirusdan vafot etganlar soni ilgari hisoblanganidan ikki baravar ko‘p. Bu haqda Jons Hopkins universiteti ma’lumotlariga tayanib BBC xabar berdi.
Mavjud ma’lumotlar qayta ko‘rib chiqilganidan so‘ng Peruda COVID-19 oqibatida 180 mingdan ortiq odam vafot etgani aniqlandi. Ilgari 69 ming kishining vafoti ma’lum edi.
Yangi ma’lumotlar 33 million aholi istiqomat qiladigan ushbu mamlakatda aholi jon boshiga to‘g‘ri keladigan o‘lim koeffitsiyentini dunyodagi eng yuqori ko‘rsatkichga aylantirmoqda. Peruning 100 ming aholisiga 500 o‘lim to‘g‘ri kelmoqda. Ilgari bu borada Vengriya 100 ming kishiga 300 o‘lim ko‘rsatkichi bilan yetakchi edi.
Taqqoslash uchun, Peruga qo‘shni Kolumbiyada COVID-19 tufayli 88 mingdan ortiq kishi vafot etgan. Braziliya koronavirus qurbonlari sonining ko‘pligi bo‘yicha dunyodagi eng yuqori o‘rinlardan biriga egalik qiladi, shu bilan birga mamlakatda 211 million kishiga 460 ming o‘lim to‘g‘ri keladi.
Peru bosh vaziri Violeta Bermudesning so‘zlariga ko‘ra, o‘limlar soni haqidagi yangi ma’lumotlar Peru va xalqaro ekspertlarning tahlillariga asoslangan. Ushbu raqamlar o‘tgan yillarga nisbatan o‘limning haddan ziyod yuqori bo‘lgan ko‘rsatkichlari o‘rganib chiqilganidan so‘ng olingan.
BBC ta’kidlashicha, sog‘liqni saqlash tizimining holdan toygani va kislorod yetishmovchiligi sababli Peru Lotin Amerikasidagi COVID-19’ning og‘ir zarbasiga uchragan mamlakatlardan biriga aylandi. Pandemiya boshlanganidan beri Peruda 1,9 milliondan ortiq kishida infeksiya qayd etildi.
Ta’kidlanishicha, aksariyat peruliklarda muzlatgich yo‘qligi infeksiyaning tarqalishiga yordam bermoqda: shunday sharoitda odamlar deyarli har kuni do‘kon va bozorlarga borishga majbur bo‘lmoqda.
Peruda fevral oyining birinchi yarmida aholini COVID-19’ga qarshi emlash ishlari boshlangan.
Izoh (0)