Farg‘onada O‘zbekistonda ilk marta “Onalarga ehtirom” festivali o‘tkazildi. Bu haqda “Daryo” muxbiri Azizjon Ermatov xabar berdi.
Marg‘ilon shahridagi “Ijodkorlar bog‘i”da bo‘lib o‘tgan festival g‘oliblarini tantanali taqdirlash marosimida viloyatning barcha shahar va tumanlaridan kelgan 1 ming 600 nafardan ziyod mo‘tabar onaxonlar hamda ayollar ishtirok etgan.
Qayd etilishicha, tadbirda Farg‘ona viloyati hokimi Xayrulla Bozorov, madaniyat vaziri Ozodbek Nazarbekov, mahalla va oilani qo‘llab-quvvatlash vazirining birinchi o‘rinbosari Gulnora Ma’rufova qatnashib, farg‘onalik onalarga ehtirom ko‘rsatgan.
Ma’lum qilinishicha, viloyatdagi shahar-tumanlar vakillari tomonidan har bir hududning o‘ziga xos jihatlari, onalarga bo‘lgan hurmat-ehtiromni ifoda etgan turli ko‘rgazmalar, badiiy chiqishlar va madaniy-ma’rifiy tadbirlar namoyish etilgan.
Festivalda milliy va zamonaviy liboslar ko‘rgazmasi, “Onalarga bag‘ishlangan eng yaxshi qo‘shiq”, “Onalarga bag‘ishlangan eng yaxshi videorolik va dil izhorlari” hamda “Alla” tanlovlari, taniqli san’atkorlar va folklor jamoalari ishtirokida konsert dasturlari o‘tkazilgan.
Festival doirasida “Eng ma’rifatli farzand onasi”, “Eng yaxshi harbiylar sulolasi onasi”, “Eng yaxshi shifokorlar sulolasi onasi”, “Eng yaxshi rahbar ona”, “Eng yaxshi olima ona” kabi 25 ta nominatsiya bo‘yicha g‘olib bo‘lgan onalarga maxsus mukofotlar topshirilgan.
Ta’kidlanishicha, bir oy davomida viloyatning barcha shahar-tumanlarida o‘tkazilgan festival tadbirlarida 10 ming nafardan ziyod farg‘onalik onalarga ehtirom ko‘rsatilgan.
Izoh (0)