Nigeriyada jangarilar 200 nafar maktab o‘quvchisini o‘g‘irlab ketdi

Nigeriyaning Niger shtatida qurollangan jangarilar maktabga hujum qildi va 200 nafar o‘quvchini o‘g‘irlab ketdi, deb yozmoqda Tengrinews.

Punch gazetasining ma’lumotlariga ko‘ra, 30-may kunining yarmida jangarilar Tegina shahridagi maktabga hujum uyushtirdi. Buning oqibatida ikki kishi yaralandi. Yaralanganlardan birining halok bo‘lgani, ikkinchisining esa og‘ir ahvolda ekani aytilmoqda.

Niger shtati hukumati hujum bo‘lganini tasdiqladi, lekin o‘g‘irlab ketilgan bolalarning soni aniq emasligini aytdi.

Nigeriyada bu holat o‘quvchilarning o‘g‘irlab ketilishi bo‘yicha birinchisi emas. Jangarilar odatda ular evaziga pul talab qiladi.

OAV ma’lumotlariga ko‘ra, 2021-yilning boshidan buyon Nigeriyada, taxminan, 700 nafar o‘quvchi o‘g‘irlab ketildi. Mamlakatning shimolida mart oyidan buyon 600 dan ortiq maktab yopildi. Hukumat barcha ta’lim muassasalarida xavfsizlik choralarini kuchaytirdi.

Avvalroq qurollangan jangarilar Nigeriyaning Zamfara shtatida maktabga hujum uyushtirib, 317 nafar o‘quvchi qizni o‘g‘irlab ketgani haqida xabar berildi. Maktab-internatda, taxminan, 500 nafar o‘quvchi qiz yashagan va o‘qigan. Ularning ayrimlari jangarilar qo‘lidan qochib qutilgan va yotoqxonaga qaytgan, deyiladi CNN manbasi bergan axborotda.

Ushbu voqeadan to‘rt kun o‘tib o‘quvchi qizlar qaytarilgan. Bolalarning qaytishi to‘g‘risida viloyat hukumati vakili Yusuf Idris e’lon qilgan. Ammo u o‘quvchi qizlarning aynan qanday qutqarilgani va ular uchun to‘lov to‘lash kerakmi yoki yo‘qligini aytmagan. Qizlarning barchasi sog‘-salomat qaytib kelgan.