Qashqadaryo viloyatining Shahrisabz shahrida tibbiyot xodimlari ishdan tashqari paytda majburiy mehnatga jalb qilingani xabar berildi. “Daryo” muxbiri vaziyatga aniqlik kiritish maqsadida Shahrisabz shahar tibbiyot birlashmasi boshlig‘i Murod Norov bilan suhbatlashdi.
“Aslida xodimlarimiz hazil-huzul qilib, o‘zlarini videoga olishgan ekan. Endi ‘bekor qilibmiz’ deya afsuslanishyapti. Hech kim ularni majburiy mehnatga jalb qilmagan. Qolaversa, videodagi xodimlarimizning barchasi shu atrofning, tibbiyot birlashmasi binolarining tozaligiga javobgar bo‘lgan sanitarkalar bo‘lgan. Ularning ishi aslida shunday tozalashdan iborat”, — deydi shahar tibbiyot birlashmasi bosh shifokori Murod Norov.
Viloyat Mehnat bandlik boshqarmasi boshlig‘i Bekzod Qurbonov esa videodagi holatni tasdiqlab, tibbiyot birlashmasida majburiy mehnatga yo‘l qo‘yilgan bo‘lishi mumkinligini, vaziyat xodimlar tomonidan o‘rganilayotganini, natija tez orada OAVga taqdim etilishini bildirdi.
Viloyat sog‘liqni saqlash boshqarmasi axborot xizmati rahbari Nuriddin Egamov ham videodagi holat Sog‘liqni saqlash boshqarmasi tomonidan o‘rganilayotganini, natija haqida xabar berilishini ma’lum qildi.Eslatib o‘tamiz, Qashqadaryoda bundan avval ham tibbiyot xodimlarining majburiy mehnatga jalb qilingani — Yakkabog‘ tumani tibbiyot birlashmasida 17-aprel kuni birlashma xodimlari binoning atrofida tozalik va obodonlashtirish ishlariga chiqarilgani xabar qilingandi.
Izoh (0)