Hindistonning g‘arbida sodir bo‘lgan siklon natijasida 20 nafardan ortiq odam qurbon bo‘ldi

Hindistonning g‘arbida sodir bo‘lgan siklon natijasida eng kamida 21 kishi qurbon bo‘ldi. Bu haqda mahalliy OAVga tayanib “Interfaks” xabar berdi.

Yana 96 kishining bedarak yo‘qolgani aytilmoqda. Kuchli shamol daraxtlarni qo‘porib tashladi. Oqibatda elektr energiyasi simlariga zarar yetib, yuz minglab aholi elektr energiyasidan uzilib qoldi.

Mahally meteorologiya xizmatining ma’lumotlariga ko‘ra, 17-may kuni kechqurun shamol tezligi soatiga 210 kilometrgacha chiqdi.

Gujarot shtatidagi aeroportlar, shu jumladan, Sardar Vallabxay Patel nomidagi xalqaro aeroport yopildi.

Bundan tashqari, hodisa Mumbay qirg‘oqlaridagi bortida jami 400 kishi bo‘lgan ikkita kemaga ham salbiy ta’sir ko‘rsatdi. Qutqaruvchilar evakuatsiya ishlarini olib bormoqda, lekin noqulay ob-havo sharoiti tufayli hozircha faqat 177 kishi qutqarildi.

Siklon bosqichma-bosqich zaiflashib bormoqda, lekin yaqin kunlarda Hindistonning aksariyat hududlarida, ayniqsa Gujaro va Maxarashtra shtatlarida kuchli yog‘ingarchilik kutilmoqda.

Ma’lum bo‘lishicha, yaqin kunlarda hukumat bir vaqtning o‘zida tabiiy ofat oqibatlarini bartaraf etish va koronavirus tarqalishiga qarshi kurashni davom ettirishi kerak.

So‘nggi haftalarda Hindistonda koronavirus keng tarqalayotgani sababli keskin vaziyat yuzaga keldi. Shu bilan birga, mamlakatda koronavirusning o‘ta xavfli “hindcha” turi aniqlangani haqida ham xabar berildi.

Hindiston koronavirus bilan kasallangalar soni bo‘yicha dunyoda ikkinchi o‘rindi turibdi. Pandemiya boshidan buyon 24,9 million kishi koronavirus bilan kasallandi.

Avvalroq Hindistonning Bixar shtatida Ganga daryosidan COVID-19 tufayli vafot etgani taxmin qilinayotgan kamida o‘ttiz kishining jasadi topilgani haqida xabar berildi. Hindiston hukumati o‘liklarning suvga noqonuniy ravishda tashlanishining oldini olish maqsadida Ganga daryosiga to‘rlar o‘rnatdi.