Gollivud aktyorlari Robert Pattinson, Yuen MakGregor va Lili Kollinz yangi xayriya tashabbusi yaratilishini e’lon qildi. GoCompaign tashkilotining elchilari sifatida aktyorlar Hindistonda koronavirus pandemiyasidan aziyat chekkanlarga yordam ko‘rsatish niyatida, deb xabar beradi “Film.ru”.
Hindistonda bir kunning o‘zida (7-may kuni) 400 mingdan ortiq odamda koronavirus tasdiqlangan (ushbu haftadagi ko‘rsatkich — 1,57 million). Shuningdek, mamlakat o‘lim statistikasi bo‘yicha ham yetakchi — 2020-yildan boshlab pandemiya oqibatida 238 mingdan ortiq odam vafot etgan.
Aktyorlar tomonidan tashkil etilgan COVID Relief Fund hindlarga PZR-testlar, vaksinadan foydalanish imkoniyati, oksimetrlar, jabrlangan oilalarga oziq-ovqat mahsulotlari, uy sharoitida o‘qitish kabi imkoniyatlarni taqdim etadi.
“Ular himoya vositalari, kislorod, hayotini saqlab qolish uchun dorilar hamda yegulikka juda muhtoj. Hindistonga safarimdan eng yorqin xotiralar qolgan, ushbu mamlakat mening qalbimda alohida joy egallaydi”, — deydi “Emili Parijda” serialining yulduzi Kollinz.
“Bu haqda haqiqatan ahamiyatli investitsion fond sifatida o‘ylang. Ular dollarlaringizni oladi va maksimal natija uchun farzandlariga tikadi”, — deya qo‘shimcha qiladi Pattinson.
Bunga qadar aktrisa va prodyuser Priyanka Chopra-Jonas hindistonliklarga yordam berish zarurligi haqida gapirgandi. Netflix’dagi “Men hech qachon…” serialining yaratuvchisi Mindi Keyling Hindistonni qo‘llab-quvvatlash maqsadida ikkinchi mavsum ssenariysi ommaviy o‘qilishini e’lon qilgandi. Yig‘ilgan mablag‘larning barchasi xayriya tashkilotlariga yo‘naltiriladi.
Mavzuga doir: JSST Hindistondagi koronavirus bilan bog‘liq og‘ir vaziyat istalgan davlatda yuz berishi mumkinligidan ogohlantirdi
Izoh (0)